BULAWAYO - Umthethwandaba waphezulu oweElectoral Court, usuvumele isicelo somkhokheli webandla eliphikisayo eleUnited Zimbabwe Alliance, uNkosikazi Elizabeth Valerio, ukuba ancintise kukhetho lukamongameli, oluqhutshwa lonyaka mhlaka 23 Ncwabakazi.
Kusenjalo umantshi wakoBulawayo uthi uzakhipha isinqumo sodaba lwabacatshangelwa ukuthi ngabalandeli bebandla leZanu-PF abaphanyeka udaba lokuzama ukuvimba ukuncintisa kwabalitshumi 12 abancintisa bemele ibandla leCitizens Coalition For Change kuzikhundla zedale lephalamende besithi ingwalo zabo zangeniswa eNomination Court eyeZimbabwe Electoral Commission isivaliwe lesikhathi esivunyelwanayo sesedlule.
UNkosikazi Valerio wayeseyalelwe ukufaka ingwalo zakhe zokuthi abhalise ukuncintisa esikhundleni sikamongameli ngabekomishini ebona ngezokhetho eyeZimbabwe Electoral Commission bethi imbadalo yakhe yokubhalisa yangena isikhathi ababesibekile sesedlule.
Ekhuluma ngemva kokwethulwa kwalesis’inqumo ngumthethwandaba oweElectoral Court, uNkosikazi Valerio uthe bayasamukela ngenjabulo lesi sinqumo.
"Angizange ngiphiwe ithuba lokuthi ngibe kuballot njalo iZimbabwe Electoral Commitee yala i-application yami ukuthi ngicintise kulolukhetho. Kodwa ke inkantolo isithethe isinqumo sokuthi ibizo lami lizafakwa ku-ballot. Ngijabule kakhulukazi ngoba sokuzake kube lomuntu wesifazane ozabaku kuballot mhla ka 23 August."
UMfundisi Frank Mhlanga, umsekeli kaNkosikazi Elizabeth Valerio, uthi kuhle ukuthi sebevume iqiniso elalivele liyilo.
"Sijabule kakhulu simanzi nte ngokujabula ukuthi ekugcineni bazebavuma ukuthi upresident wethu umongameli wethu laye angene kulolu khetho. Babethi bona imali azibonisi kuma systems abo awe ZEC kodwa kuyikuthi sasibhadalile ngesikhathi thina sabhadala konke kwahamba ngesikhathi esifaneleyo. Bona basebesithi izimali azibonisi ku sytems zabo kodwa ke hayi, siyabonga ukuthi sebeze bakuvuma iqiniso elalivele liyilo."
UNkosikazi Valerio nguye yedwa owesifazana ozancintisa kukhetho oluzayo lokudinga umongameli welizwe phakathi kwabesilisa abalitshumi lanye -11, abagoqela uMongameli Emmerson Mnangagwa webandla leZanu PF, Nelson Chamisa weCCC labanye.
Kusenjalo, ibandla leCCC litshele umthethwandaba waphezulu wakoBulawayo ukuthi awusaqhubekeli phambili ebophisa abangena kukhetho besebenzisa igama lenhlanganiso le olwama double candidates. Esigabeni sePelandaba Tshabalala sokuzancintisa uSoneni Ncube lo Gift Ostallos Siziba bele iCCC bobabili. Unkosazana Soneni Moyo uthi sesiyakhankasa ekhululekile.
“Bengivunyelwe lami ukuthi ngingene since bebesithi mina ngingangeni but njengebandla engikulo babona ukuthi kufanele ukuthi ngingene kuCCC”.
Lelibandla llama double candidates laku Council koBulawayo. Udaba lwakhona luzangena enkantolo ephakeme kusasa. UMnu. Mbuso Siso ngomunye weCCC wabancintisa bebabili kukhetho lokuba ngukhansila.
"Sebeyaqhubeka bengama candidates akuwonale ama constituencies abakuwo So hatshi nje lathi nje elethu seli shithwe to kusasa okungangokuthi sesizamelela okwakusasa sizwe ukuthi inkantolo ithini."
Kolunye njalo udaba obelusemthethwandaba weHigh Court, uMahluli Bongani Ndlovu uthe uzakwethula isinqumo sakhe kusasa ngodaba lwama lunga aweCCC alitshumi lambili-12 abavinjwe ukuthi bancintise kukhetho oluzayo bemele lelibandla edale lephalamende.
UMnu Decent Bajila ngomunye wabo yena ufuna ukumela ilokitshi le Makhandeni.
“Labo abayibo abasibophisayo ukuthi ngokubona kwabo amaphepha ethu awafikanga ngesikhathi esiqondileyo. Kodwa hayi thina vele silaso isibindi siyakwazi ukuthi sizabe sikhona mzukwana wokhetho.”
UMnu. Pashor Sibanda yena udinga ukumela iCCC eCowdray Park, kukhetho luka mhlaka 23 Ncwabakazi.
“Thina amaphepha ethu abekwa ngesikhathi , abekwa ngesikhathi sibili lokhu ngikhuluma ngilesiqiniseko and yikho okukhulunywa emtyethwa ndaba so simelele ukuthi umahluleli akubeke kube kahle. Bathi bona thina saphuza ukufaka amaphepha okuyikho thina esikwalayo ukuthi vele kasiphuzanga ukufaka amaphepha."
Ohlaziya ezombusazwe, uMnu. Sengezo Tshabangu, uthi ibandla leCCC liswele ubukhokheli obuqotho yikho sebehlangana lodubo olunje.
"Ukungabi le leadership,ukungabi le constitution, ukungabi le collective decision, ukungabi lama structures kuzasibulala. Ngoba okwenzalayo e court lapha angisilo gqwetha kodwa ngiyakubona ukuthi singathengisa iBulawayo."
NgoLwesine, umahluli uthe uzakwethula isinqumo sokuthi abalitshumi lambili abeCCC bayancintisa kukhetho bemele uBulawayo kumbe hatshi.
Forum