Bulawayo - Abenhlanganiso eyeCentre for Innovation and Technology (CITE) bahlanganise abancintisa ukuba ngokhansila kusigaba sePumula koBulawayo kungxoxo mpikiswano ukuze bethule abakhangelele ukukwenzela uzulu nxa bengaphumelela kukhetho.
Ilokitshi lePumula libhekane lokunengi okuhlupha uzulu.
Lingxoxo mpikiswano ibigoqela abamabandla akhankasela isihlalo sikakhansila ePumula kuWard 17 agoqela eleZANU-PF, Zimbabwe African People’s Union (ZAPU), Citizens Coalition for Change (CCC), Mthwakazi Republic Party (MRP), Economic Freedom Fighters (EFF) kanye leFree Zimbabwe Congress.
UNkosikazi Sikhululekile Moyo, omele ibandla leCCC, uthi uzimisele ukuba asebenze ndawonye lezakhamizi zePumula njengalokhu abakwenza.
"Lamuhla sibe lombuthane omuhle, sikhuluma izinto ezizazenza. Ngiyabonga ngoba kutshengise ukuba sesingaba ngabantu abasebenza ndawonye singela kuxabana. Mina njengoba ngicela usekelo kuzakhamuzi zika Ward 17, ngithembisa ukuba yisigijimi senu. Okunye engikucelayo yikubana sivotele uPresident u Advocate Nelson Chamisa."
UNkosikazi Nosizo Mpuwa, owebandla leEFF, ulandisa ngafisa ukukwenza elokitshini lePumula.
"Ngiyazi ukubana kukhona okonakalayo, i kakhulu izititshi ezidubukayo, ukuhamba kwamanzi okunye njalo yimigwaqo engizazama ukuthi ngibone ukuthi iyalungiswa. Silentandane, silabogogo abahluphekayo, abagogekileyo sibonisane ukuthi singabaphathisa njani. Sincedise abantu ukuba bathole incwadi zokuzalwa, ngikhuluma ngokwenze kuthi khonapha ePumula umtwana ozibopheleyo utholakale ukuba kala sithupha. Ngithembisa konke okuhle.”
UMnunzana Nkosilathi Moyo omele ibandla leZanu PF uthi engangena esikhundleni uzakwenelisa ukuthi akhiphe amaChina ngoba elamandla okukwenza.
“Mayelana lendaba yama China, mina nxa lingangithuma ngizakwenza ama China abuyele. Ngilawo amandla okwenza lokhu. Lakuma youth, ngikhangele indawo eduze le St Peter’s, iganga leliyana ukuba sakhele ama youth izindlu kanye labanye omama abatsha.”
UNkosikazi Mhlanga webandla leZim Congress Party uthi uzasebenzisanza lezakhamizi ukuthi kuthuthukise isigaba sikaward 17.
“Ngifisa ukuthi silungise imigwaqo yonke kusiya fika ku Khami, basifakele ama solar lights. Ngikhangelele ukuthi sisebenzise i Hall leyi sibe le woman’s club, khathesi i Hall leyi isetshenziswa ngabama Church kuphela. Sibe lama workshops okwenza imisebenzi yezandla.”
Ingxoxo mpikiswano le, eqoqwe ngabe Center for Innovation and Technology bemanyene labe Habakuk Trust labe Bulawayo Progressive Residents association, iphe inkokheli zamabandla ehlukeneyo ithuba lokwethulela izakhamuzi zePumula imisebenzi ezikhangele ukuyenza nxa bengaphumelela ukuvotelwa kukhetho lokuba ngukhansila, olwenziwa ngenyanga ezayo kaNcwabakazi.
Kusigaba lesi kulabesifazane abane abakhankasayo, lokhu okungconywe yinhlanganiso eyezakhamuzi eye Bulawayo Progressive Residents Association ukubona abesifazane bephatheka kwezombangazwe.
Forum