BULAWAYO - Umkhokheli webandla leCitizens Coalition for Change, uMnu. Nelson Chamisa, uqhubekele phambili namuhla ekhankasela ukhetho olukhulu oluzayo.
Ubesesigabeni seSibomvu, eMzingwane, esabelweni seMatabeleland, kulandela imihlangano ayenze lozulu eBulilima ngoLwesihlanu.
UChamisa utshele abalandeli bebandla leli ukuthi bevotele inguquko. Ubatshele ukuthi ibandla leCCC lizanqoba kukhetho oluzayo.
"Ngifuna ukuthi hayi eMzingwane, we want change khonapho eMzingwane. Sifuna ukusapota iCCC sikwazi ukuthi CCC is the party of the future, is the next government in this country. Ilizwe lonke wagcwalisa ukuthi hayi umujaya ugcwalisa ilizwe lonke."
Ekhuluma ngentuthuko ezabelweni, uChamisa utshele uzulu obethe gwaqa eSibomvu ukuthi uhulumende wakhe uzanika izabelo amandla.
"We want to empower ama locals and make sure that we have devolution. When you have devolution you have devolved development. Devolution is the key to development not just in uMzingwane, in Matabeleland. Matabeleland has been forsaken and forgotten for a long time, Zanu PF has forgotten Matabeleland. They just want votes from Matabeleland but they do not want to develop eMatabeleland.”
Utshele inkulungwane lenkulungwane zabantu ukuthi iZanu PF ikhuluma amanga uma isithi uhulumende weCCC uzabisela umhlabathi kwabamhlophe. UChamisa uthe lokhu ngamanga aluhlaza tshoko.
"Ujaha uzangena uzathatha umhlabathi wonke, uzanika umhlabathi amakhiwa. Balitshela amanga. Umfana uzangena uzakunika ama title deeds, umfana uzakunika umhlabathi. Nxa usemhlabathini akumelanga ukhitshe yi-government."
Kusenjalo, ibandla leZanu-PF lalo liphatheka kumkhankaso wokhetho oluzayo. Ezigabeni ezinengi zelizwe lasemadolobheni, amalunga edale lePolitibro alelibandla aphume ijumo encedisa ukukhankasa. Omunye wabo nguMnu. Tshinga Dube.
"Namhlanje siyakhampeyina mina ngilapha eNkulumane loProfessor Mthuli. Into eziqakatheke ngayo yikuthi inkunzi iyaziwa ngamathole ayo. Sesiwabonile amathole kamdala so siyabesikhumbuza abantu nje ukuthi yeyi liyabona into asezenzile undoda lo ziyabukeka siyaphambili."
Kolunye udaba, ibandla leZapu likhala ngokuvinjwa ngamapholisa ukwenza imhlangano yalo yokukhankasela ukhetho olukhulu oluzayo. UMnu. Sibangilizwe Nkomo, umkhokheli weZapu, uthi amapholisa avimbe umhlangano wabo eMaphisa ngoMgqibelo.
"Kuyadanisa kakhulu ukuthi amapholisa akhanya ayathatha uhlangothi nxa besenza izinto zomthetho, bayakhetha ibandla abalisapota. Sesibonile ukuthi amapholisa kukhanya ama lebandla elibusayo elezanu. Sicela ukthi sinikwe amathuba alinganayo nxa sokubuya kwezokukhankasela umbuso we Zimbabwe. Nxa iZanu siku panic mode iyaqala ukuyenza izinto zodlame ngesiNdebele sithi okungapheliyo kuyahlola.”
Amapholisa eKezi alile ukutshela iStudio 7 ukuthi avimbeleni umhlangano weZapu izolo. Kukhanya amabandla amanengi ancintisa kukhetho lwalonyaka aphatheke okwamagama ekhankasela ukhetho. UMnu. Innocent Ndibali, umkhokheli we Economic Freedom Fighters Zimbabwe, uthi bayasebenza phakathi kukazulu.
"Sigcwele indawo yonke. Safaka amakhansila amanengi koBulawayo, amanengi eNkayi, amanengi eGwanda, njalo amanengi eMatopo. So, sibhizi siyagijima siyakampheyina ikakhulu ama door to door."
Inengi labantu kukhanya selimelele ukhetho oluzaqhutshwa mhlaka 23 Ncwabakazi lonyaka.
Forum