BULAWAYO - Unozinti ongasadlali inguqu kuzinga eliphezulu, uNdodana Sibanda, usebenzisa akufunda ngesikhathi esadlala ukuncedisa indodana yakhe engeyinye yabonozinti beqembu leHighlanders, uGerald.
UNdodana uthi akasuye owakhuthaza umntanakhe ukuba alandele enyaweni zakhe abe ngunozinti njengaye.
“UGerald uqale engakwazi ukuthi yena vele ufuna ukudlala ngaphi. Ngumuntu lwana obezonda engabona bengahlohli phambili abesesuka ayedlala phambili. Kuthi njalo egedini nxa kungasahambi kuhle abuyele ayebamba. Ngicine sengisithi akayekele ukuba nxa zombili azikhethele yena ukuba ufuna ukudlala ngaphi, wasesithi yena ufuna ukuba ngunozinti. Yikho lapho ke lami engimthengele khona impahla zokusebenzisa.”
Kuthe ngemva kokuba uGerald esekhethe ukuba adlale egedini, uNdodana waqala ukuzipha isikhathi esokuba amncedise nxa ethe wathola ithuba.
“Besisithi lapho esithola khona ithuba ngimqeqetshe ngimkhuthaza. Mina ngazenzela kodwa yena ngenhlanhla enkulu ngimncedisile. Lakhathesi siyahlala phansi sibukele imidlalo ngimbonise lapho abanye onozinti besenza amaphutha lalapho abenza khona kuhle lami ngimcebisa ukuthi engazithola esesimeni esinjalo ayenze njani.”
Ngesikhathi esadlala ibhola kuzinga eliphezulu, uNdodana udlalele amaqembu ambalwa kwele Zimbabwe, eSouth Africa kanye leEswatini. Waphetha ukudlalela amaqembu aphezulu esekuqembu leGreen Fuel ngesikhathi lisadlala kusigaba sika Division One.
“Ngike ngayaqeqetsha edolobheni leHarare kusigaba sikaDivision One, ngike ngaqeqetsha njalo iqembu leGreen Fuel lapho ebengingumsekeli kamqeqetshi njalo ngidlala. Kulesikhathi lapho engike ngazibamba esidukwini lapho umqeqetshi ayesetshiye khona umsebenzi njalo ngiqhubeke lokhu ngincedisa ukuqeqetsha kwaze kwafika isikhathi esokuthi ngiyekele ukudlala.”
UNdodana udlalele amaqembu abalisa eleHighlanders, Railstars, Shooting Stars kanye leleBulawayo City kwele Zimbabwe. Udlale lakwele South Africa lapho adlalele eleGaRankuwa kanye leleFC AK. Eswatini lakho wadlalela iqembu leMbabane Highlanders kanye leleMoneni Pirates.
Forum