Abenhlanganiso ezizimeleyo ezibona ngezentuthuko, abezokholo, abezempilakahle labomthemtho, NgoLwesihlanu, bamanyane kusehlakalo sokufola edolobheni leVictoria Falls, emkhankasweni wokuveza inhlupho zokusethenziswa kwezidakamizwa kulindawo, ikakhuli kwabasakhulayo, beveza ukuba lokhu sekuyimvama njalo kuphazamisa impilo kazulu.
Ekufoleni lokhu bangene ezithaladeni bekhankakasa, beveza ukudana ngezinga abadala lentsha asebethatha ngayo izidakamizwa lotshwala besithi limpi kumele imelanwe layo kuqalela ezimuli.
Osakhulayo, uMnumzana Eugnes Sibanda obengomunye wabakade bekulumkhankaso wokufola kulandela ukuphunyuka kwakhe emjibileni wezidakamizwa, uthi adlula kikho kakufiseli loba ngubani.
USibanda wayeseleminyaka emihlanu ekwenza lokhu ehlala emabholokweni kwele South Africa njalo esidla okulahliweyo esithi wazithola sekwenza lokhu kulandela ukulahlwa kwakhe nguyise.
“Ngangibhema inyaope, icoacaine, crystal, dagga ngifaka ekudleni, ngizihlaba okunye ngihotsha ngamakhala kodwa kwangiphambanisa kakhulu ngoba ngaswela yona intombi yokungiqoma phinde ngalahlekelwa yimuli yami yonke. Kubi lokhu njalo yibuwula ukucabanga ukuthi ziyimpendulo kunhlupho zethu.”
TEXT:UNkosikazi Seagent Chipo Feya obemele emapholisa, uthi phezu kwabonyaope, inengi selibilisa okudliwayo leminye imigcozo ukwenza izidakamizwa lezi. Uthi mihla lamalanga babikelwa ngohlupho, njalo inengi selidlwengula.
“Kubuhlungu kakhulu nxa sikhangela abantwana bethu ngoba bengathatha lokhu sebengena kwezocansi bedlwengulana bebuya njalo bengenela abantwana abancane belala labo. Lapha sekunzima, ngakho kumele sonke sibambane njengelizwe njengesigaba ngoba amanye athengiswa ezindlini ngokungekho emthethweni.”
UMnumzana Isaac Dube owenhlanganiso eye ReachOut uyakusekela lokhu.
“Istastic iphumile yathi amayouths khonapha eVictoria Falls ikakhulu kuward 9 sebegula imikhuhlane yengqondo ku age group ye 14 le 24 ngenxa yama drugs la lamapholisa athi amacala e domestic violence le gender aseqansile njalo amayouths ayabulalana yikho sasesisithi ngcono sibuyeni sonkeni senzeni umkhankaso lo.”
UMnumzana Mischeck Ngulube obemele inhlanganiso ekumsebenzi wokunakekelwa kwabantwana eye Mhambi Children’s Foundation uthi abazali labo balomlandu ekulwisaneni laloludubo.
Forum