Umkhokheli webandla leMovement for Democratic Change, uMnu. Douglas Mwonzora, uthi usephumile kukhetho lukamongameli ngoba akuqhutshwa kahle ukhetho lolu yiZimbabwe Electoral Commission (ZEC).
UMwonzora ukhonona njalo ngokwalelwa ukubhalisa kwamalunga ebandla lakhe angamatshumi phose athobamunwemunye - 87, ukuba ancintise kukhetho lukamhlaka 23 Ncwabakazi.
UMwonzora uveze lokhu namuhla eHarare emhlanganweni awenze lentathelizindaba, ongenwe njalo ngabazehlola ukuqhutshwa kokhetho phansi kwenhlanganiso yomanyano wamazwe aweEuropean Union.
Uthi lelinyathelo balithethe kulandela isinqumo seNational Council sebenanzelele ukuthi akusizi lutho ukuba kungenwe kukhetho lokudinga umongameli kodwa kulamalunga angamatshumi ayisificaminwemibili lasikhombisa - 87 abalelwayo ukuphatheka kukhetho.
Uti ibandla leZanu PF livimbe njalo ukuba eleMDC-T linikwe nguhulumende imali yamalunga ebandla leli abazahanjiswa endaweni zokuvota – amapolling stations.
Kodwa umqondisi obonangokwethulwa kwemibiko kuZanu PF, uMnumzana Farai Marapira, uthi ngamanga aluhlaza tshoko okukhulunywa nguMwonzora.
UNkosikazi Abigail Mupambi, umqondisi wenhlanganiso ekhankasela ukufundiswa kukazulu ngesisekelo sombuso eye#This Constitution, uthi akuzwakali okukhulunywa nguMwonzora.
Lumsakazo kawusanelisanga ukuzwa okuvela kwabe ZEC njengoma umsekeli kamgcinisihlalo waleyonhlanganiso, uCommissioner Rodney Simukai Kiwa, ubengakayiphenduli imibuzo ayithunyelweyo ngesikhathi loludaba lulotshwa.
Forum