Amapholisa asemise imikhankaso eqhutshwa ebusuku ama night rallies kanye lalabo abahamba beqoqodela abantu ezindlini bekhankasela ukuthi bathole usekelo lokuvotelwa, esithi lokhu kulakho ukudala ingxabano ngoba abantu belemibino etshiyeneyo ngezombusazwe.
Ngesikhathi amapholisa esaphenya ngodlame olube khona elokitshini leGlen View eHarare lapha okwabulawa ilunga le Citizen Coalition for Change (CCC) asexwayise abamabandla ezombusazwe ukuba bananzelele nxa bekhankasa bebhoda ngezindlu ngezindlu ngoba lokhu kungesinye sezizatho sokwengeza izehlakalo zodlame elizweni.
Umsekeli wesikhulumeli sebandla leCCC, uMnu Ostallos Siziba, uthi nxa bebhoda ezindlini kababambi muntu ngamandla, uzulu ukhululekile ukuthi atsho ukuba bangene kumbe badlulele phambili.
“Thina njengebandla leCCC sizwile indaba yokuthi amapholisa athi kungayenziwa ama activity ebusuku,sizalandela izikhathi esiyabe sizifakile.We hope amapholisa azahlonipha izikhathi zethu hayikhona ukusingcindezela kuqakathekile ukuthi kube lokuthula elizweni. Indaba yokumiswa kwama door to door ingaba yinkinga ngokubana umthetho welizwe uyatsho ukuthi wonke umuntu kuyamele ngesikhathi somkhankaso avunyelwe ukuyakhankasa ngoba kungabaludubo ukuthi bakhulume labantu.Kufanele amapholisa afake umthetho wokubana abantu akufanelanga beforce ukuya kumarally inhlelo zamabandla kufnele bekhankase.”
UMnumzana Patron Xaba, umabhalane webandla le Mthwakazi Republic Party, uthi ukukhankasa bebhoda ngendlu ngendlu kwenza ukuba bafinyelele uzulu wonke lula.
"Kunzima ukuhlangana labantu endaweni ezehlukeneyo, okufana lokuthi abantu bahlangane estadium ngoba kuyadula. Bekufinyeleleka lula ekuhambeni ngezinyawo sisenza wonalawo ama door to door. Ngakho nxa kungamiswa lokhu kuzenza kube nzima ekukhankaseni.”
UMnunzana Effort Ncube ingcwethi kwezombusazwe uthi amapholisa akumelanga angenele kwezokukhankasa kwamabandla afisa ukubotelwa lobayiliphi.
“Amapholisa awafanelanga angene ekuvimbeni amaqembu aphisayo kumbe iqembu elibusayo ukuthi bakhankase ngendlela ekhululekileyo engela dlame phakathi kodwa esikubona njalo nje yikuthi bavimbela amaqembu aphikisayo ukuthi akhankase.Bangabuya lezizatho laleziyana kodwa injongo yabo esiyibona kusosonke isikhathi yikuvimbela amaqhembu aphikisayo ukuthi angakhankasi ngokunjalo ukhetho ngeke lube ngolukhululekileyo ngakho izizatho lezo abaziphayo siyakwazi ukuthi bayazipha kodwa injongo yikuthi amaqembu aphikisayo angakhankasi.”
Isikhulumeli sabezomthetho, uCommissioner Paul Nyathi, uthi baxwayisa amalunga amabandla ehlukeneyo ombusazwe ukuba ananzelele nxa ekhankasa ebhoda ezindlini ngoba kubangela ingxabano.
“Kasimisanga ukukhankasa kubhodwa ngendlu ngendlu kodwa sithi silimukise amalunga ombusazwe ukuba lokhu kuyingozi ngoba abantu becina betshayana. Uyabe ulanda umuntu olombono otshiyeneyo lowakho kwezombangazwe, kungakho sixwayisa ukuba lokhu kuyingozi. Ngiyagcizelela ngithi kasimisanga ukubhoda ezindlini kodwa sicebisa inkokheli zombusazwe ukuba zinanzelele nxa zibhoda ngoba abantu besuka baxabane ngalokhu.”
Sekubotshwe abantu abalitshumi lambili (12) ngokuphathelane lodaba lokubulawa kwelunga leCCC, uTinashe Chitsunge, okwenzeke emzini oweGlen View, eHarare. Amapholisa athi lokhu edinga abanye ababili abaphatheka kulolu dlame. Abezomthetho sebexwayise abezombusazwe ukuba baqhube kuhle imikhankanso yabo ikakhulu nxa bebhoda ezindlini, ngoba lokhu kulakho ukudala ingxabano.
Forum