Lanxa sokusele iviki ukuthi ukhetho olukhulu lwama Harmonised elections lwenziwe eZimbabwe, inengi labantu lithi alikaboni kahle ukuthi lizavotela bani. Intathelizindaba yeStudio 7 uEzra Tshisa Sibanda uvakatshele esigabeni seMzilikazi-Mpopoma, koBulawayo, ekhuluma labahlali balumango ngenkokheli abayifunayo lobunzima abahlangana labo.
Inengi lentsha kulindawo lithi alivoti kukhetho lukamhlaka 23 Ncwabakazi ngoba bengananzwa zinkokheli.
U-Akhona Tshuma oleminyaka angamatshumi amabili lanye yokuzalwa- 21, ngomunye wabangela themba lokhetho lwalonyaka.
“Nga register ukuvota kodwa angeke ngivote abasincedi ngalutho, amayouth. Abancedi lutho ama youth yeh awufuni kuvota,” kutsho uTshuma.
Omunye njalo othi akasoze azihluphe ngokuvota, nguMelusi Moyo oleminyaka engamatshumi amabili.
“Abasincedi ngalutho la, ye balokhu besithembisa amanga bethi bazasincedisa ayi akula,” kutsho uMoyo.
“Ngile 20 years kuma elections angiboni ukuthi ngingavota , ngoba sithola izithembiso zamanga so sithola izithembiso zamanga kahle kahle thina esiyabe sikukhangelele njengama Youth siyabe sifuna ukuthi maybe kube la courses esiwayenzayo uyabo, sibe lezinto esizitholayo ezizosincedisa ngoba khathesi ngihleli angilalutho engilwenzayo empilweni,” kutsho uMoyo
UThobekile Tshuma uhlala eMpopoma uthi abahlali balindawo bakhala ngento ezinengi ezibahluphayo.
“Sikhala ngamagetsi ikakhulu emagetsini, asila magetsi, amanzi imigwaqo yethu ifile lokungcono nje okusezibhedlela nje amaclinic okunye siyabe singela zimali uthole ukuthi umntwana uyagula kuyafunakala ama 10$ asilawo. Kutholakale ukuthi ngiyagula kufunakala imali angilayo angisebenzi. Ngiyakwazi ukuthi ngizovotela ubani kodwa ngilesifiso sokuthi sicela asiqhubele izikhalazo zethu kuhulumeni wethu, ngoba asilabo abantu abazasikhulumela kabanzi ku hulumeni wethu njenge Youth yanamhlanje,” kutsho uTshuma.
UNkosikazi Smelinkosi Moyo yena uphambana labanye ethi uyavota ngeviki ezayo.
“Siwakhangelele njalo siyawathakazelela kodwa silezikjalazo njengabomama abatsha silezikhalazo asilamgwaqo imgwaqo ifile akulamsebenzi asila msebenzi asila lapho esisebenza khona. Abanengi sebengayekeliswa yizithembiso ezingathutshiyo, sebengayekela ngezithembiso ukuthi asilutholi usizo ngendlela esikhangelele ngalo, asilutholi usizo ngendlela esikhala ngalo. Sicabanga ukuthi kuthwa nxa ungumntwana ungakhala kuthwa wohluthuliswe khonapho khonapho, so thina asikwazi ukuthi sithuliswa nini njalo sizathula nini,” kutsho uMoyo.
Abancintisa kukhetho bemele abamandla abo kulesisigaba bathembisa okunengi. UMfundisi Sihle Muzenda we Freedom Alliance nguye yedwa owesifazana oncintisa kulelisigaba.
“Mina ngingumuntu wesifazana, ngikhuthaza abanye omama ukuthi kasisukumeni ngoba ukusukuma kwami lokungivotela kwenu kufanana lokuthi lani liyavuma liyasukuma lingomama. Isikhali esingasetshenziswa ukuguqula lesisimo, ngibona ingathi mina ngithembisa ukuthi omama kuzaba le Women Empowerment. Ngisukuma ngingomunye owabo mama to give an example to women ukuthi bomama yisikhathi sethu mele sisukumeni,” kutsho uMuzenda.
Umnumzana Pardon Tapfumaneyi yena uncintisa ezimele yedwa i-Independent Candidate uthi engavotelwa uzaguqula lesi sigaba.
"Mina ngiyinzalo yase Mpopoma leMzilikazi ngibuye ngenhliziyo yami yonke. Khangelanini izindlu esihlala kizo, eMabuthweni abantu basheya ama bathroom lama toilets singene izititshi ziyadubuka, abantwana bayafa nge njengu. Amaclub lapha akade sihamba khona kufile, imigwaqo ifile, amanzi kakula amagetsi akula imisebenzi kakula ama factory avalili. Lingavoteli iparty votelanini i indipendent candidate," kutsho uTapfumaneyi.
Osakhulayo uAdmire Masikati uzamela ibandla le Zanu-PF uthi uzaletha ukubambana emphakathini
“Ngizasebenza gadalala labantu bonke abase Mpopoma kungakhathalekile ukuthi uvela kuliphi ibandla, kungakhathalekile ukuthi ungubani. Indlela engizasebenza ngayo ngeyokuthi abantu bonke abase Mpopoma Mzilikazi Constituency sizabe sisebenza labo. Ngizakhipha ibhatshi yokuba yi member ye ZANU PF kodwa ngibe ngu MP wabantu bonke jikelele,” kutsho uMasikati.
Oncintisa emele ibandla ele Citizens Coalition For Change CCC, umnumzana Desmond Makaza uthi ibandla lakhe lizaletha intuthuko.
"Sifuna izikolo ezintsha njengoba ngike ngakhuluma phambilini ukuthi we want new schools, kumele sibe le ICT abantwana bethu bebe lama computer, befunde ama computer. Akuselanto eyenzayo elizweni kungasetshenziswanga ama computer. Kulendaba esiyifisayo kakhulu ku region ye Matebeleland, i issue eye devolution. Leyo ndaba is a very critical and important issue within the region," kutsho uMasikati.
Ukukhankasela ukuthola usekelo lokuvotelwa kukhetho lweviki ezayo, luka 23 Ncwabakazi, ngamabandla ezombusazwe luqhubekela phambili koBulawayo laseZimbabwe yonke jikelele, abamabandla ezombusazwe aphikisayo, labenhlanganiso ezizimeleyo bakhala ngokuqonga kwezehlakalo zodlakela lokwethuselwa kwabalemibono ehlukileyo leyebandla elibusayo.
Forum