Ikhomishini elawula ngezokhetho iZimbabwe Electoral Commissison iqale namuhla ukuvula indawo zokuvotela koBulawayo lapho abafake okuzasetshenziswa ekuvoteni kukhetho oluzaqhutshwa ngoLwesithathu.
IZimbabwe isifike esibangeni esiphezulu sokulungiselela ukhetho oluzayo. IZEC isilungisa indawo ezitshiyeneyo okuzaqhutshwelwa khona ukhetho lolu. Kukhangelelwe ukuba kuzakuba lendawo zokuvotela ezedlula kancane inkulungwane ezilitshumi lambili - 12,370 elizweni lonke. IZimbabwe Electoral Commission ithi sebedinde amaphepha okuvota edlula izigidi eziyisikhombisa – 7.1 million. Kulabantu abedlula kancane izigidi eziyisithupha lengxenye – 6.6 million ababhalisele ukuvota ngoLwesithathu.
Abakubandla elibusayo bathi izandla seziluma. UMnu. Mnu Kudakwashe Musanka, okhokhela inhlanganiso edlelana lebandla leZanu PF eyeForever Associates Zimbabwe, uthi inhlanganiso yabo isithumele abazahlola ukhetho endaweni ezitshiyeneyo.
''Sesithumele ama election observers and polling agents kuzozonke indawo ezweni ukuba basikhangelele ngehlo lokhozi ukuqhutshwa kokhetho lobanje uluhlu lwababhalisele ukuvota alukafiki kumapolling station. Amalungiselelo okhetho ahamba kuhle kuzozonke indawo zelizwe.
Isakhamuzi sakoBulawayo, uMnu. Gift Moyo osesigabeni sePelandaba-Tshabalala, uthi uluhlu lwababhalisele ukuvota alukabi khona.
"Sihambile labanye bami ukuyakhangela amabizo ethu eTshbalala Pre schoool kodwa kuze kubelamanje lokgekho asazi ukuthi kuha,mbanjani.”
Ngesikhathi kuqhutshwa ukhetho lolu, kulenhlanganiso ezizimeleyo lazo eziyabe ziluhlola. Eyinye yazo yiZimbabwe Election Support Network emelwe koBulawayo nguMnu. Thembelani Dube.
"Siphakathi kokuhlola ukhetho koBulawayo, sesithe sabhoda sihlola wonke amapooling station koBulawayo ngoba silabo abantu esesibafundisile ukuba bahlole ukhetho. Abavotisayo, amapholisa sebekhona endaweni zokuvotela lakho konke, esingakakuboni kuzo zonke indawo esesihambe kizo koBulawayo luluhlu lwamabizo alabo ababhalisela ukuvota kodwa ngomthetho iZEC ibimele ibe isiwafakile njalo yayithembisile ukuthi amabizo azabe esekhona phambilini kokhetho amalanga amabili.”
Kusenjalo, kulabanye abahambe emthethwandaba namuhla, abagoqela uMnu. Musa Kika, oweZimbabwe Human Rights NGO Forum, uMnu. Arnold Tsunga okweyinye njalo inhlanganiso elwela ilungelo loluntu labanye, abaliswe yiZEC ukuba behlole ukhetho lolu. Bafuna ukuba yingxenye yabahlola ukhetho lweZimbabwe. Bazabuyela emthethwandaba kusasa.
Forum