Lanxa impumela yokhetho isisaziwa njalo ikomoshini ebona ngezokhetho eyeZimbabwe Electoral Commission isithe uMongameli Emmerson Mnangagwa unqobile koBulawayo, kuthule zwi kodwa inengi labantu ezabelweni zeMaNdebeleni lakoBulawayo bathi bahlalele evalweni ngoba bengazi ukuthi bazahlukunyezwa yini libandla leZanu PF.
Abantu abenengi bavotele uMnu. Nelson Chamisa, owebandla leCitizens Coalition for Change.
Inengi lihlalele evalweni lisithi liyesaba ukuthi lizalandwa ezindlini litshaywe kumbe lithunjwe ngoba lingavotanga kuhle. UThando Ncube uthi wavotela uChamisa.
“Besirigile so, asizakwazi ukuthi bazosi athakha endlini njengabantu beCCC so sifuna ukubakwazi thina ezindlini zethu siSafe yini , besicelelu'kuthi amanye amazwe angenele sibekwazi ukuthi siSafe.”
UMnu. Michael Ndlovu uthi uyise wabulawa ngesikhathi sombhuqazwe weGukurahundi ngakho ubona engani uzaqala kutsha umbuqazwe.
“Njobani ngapha koBulawayo engawinanga sesisesaba iviolence ukuthi maybe sezayenza iGukurahundi, ngapha thina sikwazi ukuthi yena kawinanga koBulawayo singazi mhlawumbe kuzobalempi.”
Abanengi bathi bebelethemba ukuthi kuzaba lenguquko kodwa udubo luyaqhubekela phambili. Uyakhala uMnu. Edwin Jele.
"Ngiithwele nzima labantwabami khathesi njoba lundoda sewinile manje sizakuthini, ahhh besifisa kulungile thina into esiyifunayo yikuthi kulunge kodwa njoba elokhu esewinile futhi lundoda kutshukuthi siyabuyela kukhonokhu ,uqilile,hayi laph' uqilile."
UNkosazana Nomsa Dewa uthi koBulawayo kulokuthula.
"Hayi thina koBulawayo siziphilele nje akulanto erongo vele asiboni ,akulahlupho ,akulamsindo akulani ngoba abantu lapha koBulawayo sibambene, besivotele nje iparty yethu uChamisa.Sizw'ubuhlungu nje ukuthi kawinanga sesisesaba ukuthi bazasitshaya ukuthi asibavotelanga kodwa hayi thina sodwa ngapha kuright."
Onqobe emele ibandla leZanu-PF eGwanda South kudale lephalamende, uMnu. Omphile Marupi, uthi uyabonga ngokuthula lokubambana kwabantu beGwanda.
"Mangidlulise ukubonga kakhulu ebantwini beGwanda South bonke ukunqoba lokhu ngokwethu sonke akusokomuntu munye ,into ezinengi ebantwini baseGwanda. Ukuhlonipha nanko phela siyakubona ukuthula okukhona abaxokozeli bazithulele, okusenhliziyweni zabo yikujabula kuphela."
Isikhulumeli samapholisa akoBulawayo uChief Inspector Abednicho Ncube uthi akulambiko yokuhlukumezana ngezobusazwe KoBulawayo.
“Hayi koBulawayo is peaceful, ehh kulokuthula koBulawayo kakhulu.”
Akubonakali bantu bejabulela ukunqoba kuka Mnangagwa lebandla lakhe leZanu-PF koBulawayo lezindaweni ezinengi zelizwe.
Forum