Izifuyo esiqintini seGwanda South zibikwa sezikhotha inhlabathi ngenxa yokutshabalala kwamadlelo kanye lokoma kwamanzi emadamu alindawo, osekutshiye inengi labafuyi lidlela evalweni.
Izakhamizi zaseGohole, zithi isimo siqhubeka sisiba sibi kakhulu emangweni wabo. Okufakazwa nguMnu Victor Sibanda kuWard 17, eGwanda South othi balakho ukufelwa yizifuzo ezinengi, ikakhulu inkomo.
"Isimo sibi kakhulu ngoba lugwadula, akula manzi, ukudla sokuphelile vele zikhotha inhlabathi kwezinye indawo seziqalile ukuwa kakhulu eGwanda South okuzwisia ubuhlungu kakhulu ukuthi njengoba kunguSeptember kusiyafika uDecember hay isimo asikho sihle eqinisweni, yisomiso kuwomile inkomo sekungamathambo uyazibonela lawe ukuthi lonyaka sizafelwa yizifuyo."
Amazwi kaSibanda agcizelelwe ngesinye njalo isakhamuzi uMnu. Gabriel Moyo.
"Ziyalamba, hatshi inkomo kuphela lembuzi vele into yoke akusamanga kuhle, akusela kudla, akusela tshani inkomo sezicakile ezinye ziyawa , imbuzi ziyaphunza.Abalabafana bahamba lazo emapulazini lapho okungcono khona kodwa nxa ungela mfana zitshona zibhoda khonapha akulalutho ingani kuthanyeliwe."
UMnu. Collin Sibanda oyisakhamuzi seNtepe uthi bekuzakubangcono ngabe idamu leTuli-Manyange selakhiwa laphela ngoba inkomo sezinatha amanzi alodaka.
Idamu leli lama ukwakhiwa ngenxa yokusilela kwemali lanxa nje uhulumende wayethembise ukuthi kusiyaphela umnyaka liyabe seliphelile.
"Nxa zilamba amanzi ahlanzekileyo ekhona uzabona ukuthi lemikhuhlane eminye ehlasela izifuyo izabalutshwane kodwa ngenxa yokuthi kathesi ziyalamba ziphinde zinathe amanzi alengcekeza kuyenza lazo zingaqini, zicube, zingenwe yimkhuhlane uthole zicakile zingahlambuluki nje izifuyo kungakho idamu leManyange abantu bebelikhangelele ngamehlo abomvu ukuthi lizakwakhiwa lincede kusonaleso sigaba lalamhlanje kuthule nje."
UMnu Collen Ngwenya oweMarinoha eMatobo uthi ezabo inkomo zisaqinile ngoba belamaqhinga okuhlenga izifuyo ngesikhathi sendlala.
"Okunye njalo sesilenye indlela eyokuvula amahlanga , asisavuleli amahlanga nxa siqeda ukuvuna , sesivala , ngikhuluma nje abantu bavalile amasimu abo bagcine ukudla kwezifuyo zabo okuthiwa kuzasigcina kuze kufike esikhathini sokuthi izulu line."
Ngaphandle kokuswelakala kwamanzi ezifuyo, izakhamizi zeMatshetsheni eGwanda North sezihamba imango emide ukuyadinga amanzi okunatha, kutsho ukhansila kaWard 1 uMnu Stanford Nkala.
"Amanzi aseqalisa ukuthi izikotsho kwezinye indawo ziswele amanzi abantu sebehamba imango emide kwamanye amavillages besiya lapho okuyabe kulamanzi khona kumbe kusedamu loba ezikotsho ezibamba amanzi, indawo yakithi yindawo ewome kakhulu izikotsho zakhona ziyatsha azifanani lakwezinye indawo."
UMnu Hatitye Muchemwe, ingcwethi yezifuyo kugatsha lukahulumende olweAgritex eGwanda uthi lanxa kungakabi lenkomo eseziqalile ukucuba, isimo sibi ikakhulu ezinqintini zeGwanda, Insiza, Beitbridge, Matobo lengxenye yeMangwe.
Ngokunjalo, uthi kuyadingeka ukuthi uzulu adingele izifuyo ukudla. Inkulungwane zenkomo zibulewe yindlala eminyakeni edluleyo kulesisabelo kulandela ukungani kuhle kwezulu.
Forum