Kulomntwana olaliswe esibhedlela kulandela ukulunywa yinyoka ngesikhathi eleZimbabwe libhekane lokusilela komuthi wokwelapha abalunywa zinyoka. Loba kunjalo, odokotela bakhuthaza abantu ukuba bagijimele esibhedlela bengalunywa zinyoka.
UAnnabell Moyo, oleminyaka yokuzalwa elitshumi lanye - 11, ulaliswe esibhedlela seUnited Bulawayo Hospitals ngemva kokulunywa liphimpi esihlathini. Unina, uNkosikazi Memory Moyo, uchasisa ngesahlakalo lesi.
“Uthi wathi belele wezwa into engathi iyamhlaba eyinalithi yena wavuka ukuthi ayenatha amanzi,wabuyela wayalala inyoka ilokhe imise ikhanda.Uthi wezwa ogogo bekhuluma phandle wabatshengisa babona igazi kwakhanya ukuthi ulunywe yinyoka yabonakala ilokhe imise ikhanda.
UNkosikazi Sanele Moyo, ugogo kaAnnabell, uthi ucela usizo ngoba imithi edingakalayo kayikho esibhedlela.
“Into yakhona inzima kakhulu.Uma sifika lapha eUBH siyabhalelwa imithi ukuthi siyeyithenga ngoba kungela mithi e-readily available ukuthi umuntu asizakale. Siyathenga sibili kodwa i challenge yemali silayo, kuyasihlukumeza kakhulu. Uvuvukile umtwana, usebehlungwini. Siyacela kuma well wishers ukuba basiphathise”
Banengi abantu abalunywa zinyoka kulezinsuku eZimbabwe. UDokotela Edwin Sibanda, umqondisi wezempilakahle kukhansili yakoBulawayo, uthi inyoka zehlukaniswa ngokuba lobuhlungu kumbe ukungabi lobuhlungu. Ezilobuhlungu zehlukaniswe njalo ngokuthi ubuhlungu bazo buthundubeza imizwa. Ezikuginga leli zigoqela iblack mamb. Ezinye ngezenza igazi lingasanqumi, ezigoqela umgobho kumbe ukhothikhothi. Kulezinye njalo ezibangela ukubola kwalapho okulunywe khona. Lokhu kubonakala kakhulu nxa umuntu elunywe libululu.
USikhwicamfundo Solwayo Ngwenya, umqondisi wezempilakahle eMpilo General Hospital, uchasisa ngokwenzakalayo uma umuntu sethe walunywa yinyoka.
“Inyoka ziyaluma abantu ezinye zakhona zipoisonous njengeblack mamba ziyabulala abantu ngemzuzwana eyi20 umuntu uyabe esetshonile,yikho abantu bayaxwayiswa ukuthi nxa umuntu elunywe yinyoka basheshe bambise esibhedlela eside duze. Nxa bebuya khonapho bebophe lapha alunywe khona ukuthi ipoison ingahambi kakhulu, bengaze baphuza ukuya esibhedlela befaka imithi yesintu ipoison iyabe isingena ihamba.”
Uqhubekelela phambili uSikhwicamfundo Ngwenya exwayisa uzulu ngengozi yokulunywa yinyoka.
"Esibhedlela bengafika bahlatshwa ijekiseni le okuthiwa yi anti venom yiyo engathi iyasiza,abanye bakhona bangahanjiswa ku-ICU besehluleka ukuphefumula ngoba ipoison yakhona iyavala ukuthi umuntu aphefumule kumbe kuphambanise igazi.Siyaxwayisa ukuthi abantu ezindlini bebekhipha izinto ezinjengotshani lezihlahla zingaze zasondela kakhulu ezindlini inyoka lazo zisondele njalo behlale betshisa amathaya ukuthi inyoka zibekhatshana ukuvikela kuqakathekile kakhulu.”
Odokotela bathi kuqakathekile ukuthi uzulu azivikele ekulunyweni zinyoka ngokugqoka izicathulo nxa ehamba egangeni kumbe endaweni eziminyeneyo ikakhulu sekusihlwa okuyisikhathi inyoka ezihambahamba khona kakhulu. Kumele kube lesibane sokukhanyisa lapho umuntu anyathlela khona ikakhulu endaweni okuthanda khona amabululu ngoba ehamba enyonyoba njalo kulula ukuwagxoba.
Ukubamba loba ukudlala lenyoka kuyingozi kubo bonke aseduze ngoba ilalkho ukuba lolaka kumbe izame ukuzivikela ilume umuntu. Nxa umuntu engalunywa kuqakathekile ukunanzekela ukuthi ulunywe yinyoka mhlobo bani ngakho kuyasiza ukuthatha imifanekiso usemangweni ongasongozi kulo othathayo.
Forum