Sekusungulwe indawo ezelatshelwa khona izifuyo esabelweni seZansi yemaNdebeleni lapho osekufe inkulungwane zenkomo zibulawa yimikhuhlane edalwa yimkhaza. Lezi ndawo zivuselelwe ngabenhlanganiso eye European Union isebenzelana leyohlangothi olubona ngezokulima lokudla enhlanganisweni yomanyano wamazwe womhlaba olweFood and Agriculture Organization.
Ukusungulwa kwalezi ndawo kuza ngesikhathi abafuyi benkomo endaweni ezitshiyeneyo zesabelo seZansi yemaNdebeleni bekhala ezimathonsi ngokufelwa zinkomo ngenxa yemikhuhlane edalwa yimkhaza.
UNkosikazi Sibongile Khumalo uthi eInsiza sebevale izibaya ngenxa yokufelwa zinkomo.
"Umkhuhane wenkomo sulesikhathi waqala kathesi ngiyabona sokungaba yinyanga yesithupha, kuboGwatemba ngapha waqeda inkomo konke kusiyale Kubo Fort Rixon oNkakezi kwabanzima kwasala izibaya zingelalutho, ziyafa okunye okumangalisayo loba usithi uyazihlaba amajekiseni akuncedisi lutho vele, abantu abanengi izibaya bavalile. "
Ekhuluma lapho kuvulwa eyinye yalezi ndawo, zokwelaphela izifuyo, eManama ngoLwesithathu, umfuyi UMnu. Calen Mabetha uthi njengabalimi kuyabajabulisa lokhu ngoba sebezathola uncedo eduzane njalo masinyane nxa izifuyo zabo zihlaselwe yimikhuhlane.
"Sesinanzelele ukuthi izifuyo zethu ziyafa, zifa zibulawa yimikhuhlane, sekuphelile, awusayi eGwanda ngoba imithi ikhona lapha kuthiwa yi One Stop Service khonalapho khonalapho."
Esamukela okusemthethweni eyinye yalezi ndawo, umphathintambo wezenzakala eZansi yemaNdebeleni UNkosikazi Evelyn Ndlovu uthi inkomo eziyingxenye yesigidi 500 000 zibulewe yimikhuhlane etshiyeneyo eminyakeni emihlanu edlulileyo.
"Ukuvulwa kwalindawo kuza ngesikhathi silwisana lomkhuhlane yomkhaza osibulele ingxenye yezigidi zenkomo kuminyaka emihlanu edlulileyo. Loluhlelo luqakathekile ukuze sithuthuke ngenkomo. I at South ilapho okuvuma khona inkomo, lesisabelo besihamba phambili kwezenkomo eminyakeni edluleyo, ngiyathemba lonke lapha liyakhumbula bechola inyama siyifaka emagabheni khonapha kulesisabelo."
UMnu. Patrice Talla omele inhlanganiso yeFood and Agriculture Organisation of the United Nations kuleli uthi impilakahle yezifuyo iqakathekile ngoba zilokuthuthukisa umnotho welizwe nxa zithe zafuywa kuhle.
"Inkomo kulezinsuku zithwele nzima ngenxa yokuqhamuka kwemikhuhlane yemkhaza, nxa sifisa ukuthi izifuyo zethu zande kumele sizivikele kumikhuhlane lemikhazane, zidle kuhle kulondolozwe amadlelo njalo kube lendlela zokuzithengisa ecacayo, loluhlelo lujonge ukuqede lezindubo njalo luthuthukise impilakahle yezifuyo, zande njalo zithengiswe."
Umeli wequla lamazwekazi aweEuropean Union kuleli UMnu. Jobst von Kirchmann uthi kuyize ukuthi kulezijeziso zomnotho ezethulelwa eleZimbabwe esithi bayilindele ngamehlo abomvu inyama yenkomo esuka kuleli.
"Ukufuywa kwenkomo bekuqakathekiswa kakhulu ekadeni kodwa okwamanje abantu kabasakuthatheli phezulu, mhlawumbe ngenxa yemkhuhlane kodwa umbuzo yikuthi singavuselela na?, kodwa bukhona ubunzima, akulazijeziso zomnotho ngoba ukhona ongakhuluma ngazo kukhona yikuthi silesivumelwano leleZimbabwe ukuthi inyama evela ngapha ayibhadali imithelo kungakho imnyango yethu ivuliwe ayize inyama."
UMsekeli kamphathintambo wezokulima UMnu. Davis Marapira wamkele lesisipho ngezandla zombili wacela njalo ukuthi iEuropean Union isize ngocingo lokuvalela inkomo ukuze zingathelelani imikhuhlane.
"Mnumzana Ambassador siphe ucingo ngiyaphinda njalo siphe ucingo ukuze senelise ukuvalela inkomo zethu eziphilileyo lezilemkhuhlane ukuze izifuyo zethu ziphile kuhle, zande siqale lathe ukuthengisela iEuropean Union."
IEU ivuselele indawo ezifanayo ezingamatshumi amabili lasithupha elizweni lonke jikelele ezizalondoloza inhlalakahle yezifuyo kuleli ukuze zithengiseke kwamanye amazwe okubize amadola eMelika $4 million.
EleZimbabwe lilenkomo ezedlula izigidi ezinhlanu 5.4million njalo isabelo seZansi yemaNdebeleni ngesesibili elizweni lonke jikelele esilenkomo ezinengi silandela iMasvingo.
Forum