Isikhitshiwe imifanekiso eBulawayo National Gallery ebidwetshwe yafakwa nguMnu. Owen Maseko, ebiveza okwenzakala ngesikhathi eleZimbabwe lilungiselela ukhetho oluqhutshwe ngoNcwabakazi, okwenzakala ngesikhati sokhetho lokunye okukhanya kuzondise uhulumende kaMongameli Emmerson Mnangagwa.
UMaseko wazakala ngokudweba imifanekiso eveza umbhuqazwe weGukurahundi, eyecaphula uhulumende kamuyi uRobert Mugabe.
UMaseko, owabotshwa ngomnyaka ka2012 kulandela ukuphanyeka akudwebayo okumayelana lombhuqazwe weGukurahundi, usethwele nzima njalo kulandela ukwaliswa ukuvezela uzulu akudwebileyo okuhambelana lokhetho olulempumela ephikiswa libandla leCitizens Coalition for Change elikhokhelwa nguMnu. Nelson Chamisa.
UMaseko uthi utshelwe ngabaqondisi beBulawayo National Gallery ukuba ekhiphe imifanekiso, efika phose itshumi lasikhombisi abeyifake kuleyondawo kulungiselelwa umbikiso omkhulu kusasa oweIntwasa Festival.
Akudwebileyo kuveza abantu abavinjwa ukukhankasela ukhetho olusanda kuqhutshwa kwele Zimbabwe, abavota bebanjwa ngamandla, abehluleli bomthethwandaba abasebenzelana lebandla elibusayo abasebenza ngudlu lokwebiwa kokhetho lolu. UMaseko uchasisa kabanzi ngokwenzakale eBulawayo National Gallery.
"Ngilemisebenzi yami engayidwebayo ngesikhathi sisiyakukhetho olusanda kudlula njalo besesilamalanga siwufake kumbukiso eBulawayo National Art Gallery kodwa lamuhla bathe siyethule ngoba imumethe ezombangazwe kodwa eminye emumethe ezokhetho eyabanye isele."
UMaseko uthi lokhu akulunganga ngoba wake wabotshwa njalo wavinjwa ukwethulela uzulu imisebenzi yakhe ngombhuqazwe weGukurahundi.
"Lokhu sikubiza sithi yicensorship ngoba akukho okubi ngemisebenzi yami njalo okwamanye ngeke ngiqale phansi ukulungiselela iIntwasa ngoba wonke umuntu ulendlela yakhe asebenza ngayo."
UMqondisi weBulawayo National Gallery, uNkosazana Silenkosi Moyo, akathandanga ukukhuluma ngokuvinjwa kwemisebenzi kaMaseko. Isikhulumeli samapholisa, uAssistant Commissioner Paul Nyathi, uthi kazilutho ngodaba lolu.
UMaseko wavalelwa enkambeni yamapholisa okwamalanga amane ngomnyaka ka2012 kulandela ukubukisa kwakhe imifanekiso eyayiveza indlela abantu ababulawa ngayo ngesikhathi sombhuqazwe weGukurahundi.
Inhlanganiso yeCatholic Commission for Justice and Peace lezinye zathi kwabulawa abantu abafika inkulungwane ezingamatshumi amabili – 20,000 eNkabazwe lezabelweni zeMatabeleland ngesikhathi sombuqazwe weGukurahundi. Uhulumende kaMugabe loka Mongameli Emmerson Mnangagwa bazama ukukhuluma ngodaba lolu kodwa kukhanya kusakhatshana ukuba uzulu avumelane ngendlela okumele luphethwe ngayo.
Kusenjalo, umqoqi weIntwasa Arts Festival, uMnu Nkululeko Nkala, uthi usuvuselelwa umbukiso weIntwasa Arts Festival oke maniswa ngesikhathi kumemetheka umkhuhlane weCovid 19.
"Umcimbi wethu weIntwasa Arts Festival uqale izolo uyaphela NgoMqgibelo njalo siloHeather osuka eMelika uzabe ebukisa umbukiso wakhe lamuhla lakusasa kuhlanganisa lezinye inhlelo ezehlukeneyo labasakhulayo lozulu endaweni ezehlukeneyo koBulawayo."
UMnu. Butholezwe Nyathi, osebenza esigodlweni seMelika eZimbabwe, uthi uhulumwnde weMelika uyasekela ezamasiko lemidlalo lemisebenzi eminengi eZimbabwe.
"Umcimbi weIntwasa Arts Festival siyawusekela ngezemali njalo sileArtist esuka eMelika ephatheka kumcimbi walonyaka njalo laye uzahlawulwa yiMelika."
UNkosikazi Rabecca Archer- Knapper, ophethe inhlelo ezitshiyeneyo esigodlweni seMelika eHarare, ukewabuka eminye imisebenzi eseBulawayo National Gallery.
Umcimbi walonyaka weIntwasa Arts Festival 2023 uqhutshwa phansi kwesihloko esithi "lmagine it, Experience it."
Forum