Ukuthonisiswa KukaOstallos Labanye Kudluliselwa kuMfumfu

Ukuthonisiswa kwamalunga ayisithupha eCCC, agoqela amalunga edale lePhalamende amabili uMnu Gift Ostallos Siziba oweTshabalala-Pelandaba loSurrender Kopoikulu oweBulawayo Central kanye lamakhansila amabili kudluliselwe phambili ngolwesihlanu ngoba idale lingakabi lobufakazi obaneleyo.

Abasolwa bamiswe emthethwandaba kamantshi okwesibili eWestern Commonage koBulawayo besetheswa amacala okuphazamisa ukuthula kanye lokwephula imithetho ephathelane lokhetho olusanda kwedlula.

Umtshutshisi utshele umthethwandaba ukuba behlulekile ukuthola ubufakazi obacelwa ligqwetha likaSiziba labanye bakhe obuvela kunkampani kamakhalekhukhwini eyeEconet.

Ngokunjalo idale liphe ophenya icala, uTinashe Chapel, ithuba lokuyadinga ubufakazi obuveza ukuthi uSiziba wayengaphi ngelanga kudalwa icala kanye lokuthi wayetshayela bani ucingo. Udaba lolu luzangena njalo enkantolo mhlaka 13 ngoMfumfu.

USiziba, uKapoikulu labanye babo ababalisa uAlderman Earnest Rafomoyo, uTendai Masocha, uKhansila kaWard 20, uSimbarashe Dube loKhansila kaWard 13, uLovewell Mwindwe babotshwe kumaviki asanda kwedlula amapholisa esithi badabula amaphepha omkhankaso kaNkosikazi Soneni Moyo ngesikhathi sokhetho, okulicala lakuqala. Elesibili kungelokuthi bephula umthetho weCriminal Law Codification and Reform Act ngokuthethisa uMaMoyo Moyo.

Igwetha labasolwa, uMnu Tinashe Runganga uchasise okunengi.

“Ngimele uSiziba labanye bakhe kubikwa babehamba bevala amaposter kaSoneni ngawakhe ngeke ngitsho okunengi ngaloludaba ngoba siyaphenduka edale mhlaka 13 Mfumfu."

USiziba wetheswa elinye njalo icala elehlukileyo elokubangela udlakela emdlalweni wenguqu phakathi kweqembu leHighlanders leleDynamos, elilokhe lisaphenywa.

Umamangala kucala lokudatshulwa kwamagwaliba okhetho, uMaMoyo, utshele idale ukuba kajabuli ngenani labantu abaze ukuzosekela izibotshwa, kuchasisa igqwetha labasolwa.

"Umamangala lamuhla ungene edale esesotshelwa ukuba aphenduke nini edale, idale lingakahlali utshele abatshutshisi ukuba kaphatheki ngenani labantu abazolalela icala banengi kakhulu."

UNkosikazi Moyo wancintisa ukhetho esithi umela iCCC kodwa lelibandla lithi alimazi. Omunye umamangala kumacala abasolwa laba nguNkosazana Sibongile Ndlovu.