Izakhamizi zeDambashoko eGwanda North zikhala ezimathonsi ngokufelwa ngamadonki asehlaselwe ngumkhuhlane ongazakaliyo. Lokhu kuza ngesikhathi uzulu selungiselela ukulima. Abohlangothi olunakekela izifuyo olweDepartment of Veterinary Services bathi abakatholi umbiko wokufa kwamadonki lawa.
Izakhamizi zeDambashoko zididekile ngalumkhuhlane osuqede amadonki emangweni wabo oqhamuke kusukela ngenyanga edlulileyo.
Umelusi uBabusi Bhebhe uthi kube yisimanga ukufa kwamadonki njalo sebesebenza nzima emakhaya.
“Amadonki abelomunye umkhuhlane onzima kakhulu, into yakhona ibitshaya ekhanda icine itshayana lesihlala idonki yangikhona, izifuyo lezi zife kabi, eyinye icake ingadli ikhukhumale ikhanda ize icine isifa isihluku ukuthi ludubo bani angazi.Sekunzima laphana ngoba yiyo akade ephethe lamapj besitshaya ngayo, yiyo akade ethenjiwe lekulimeni so vele akusela plan, into yakhona ayisikho ekhaya kuphela ingenile.”
Amazwi la asekelwe ngugogo uJane Dube othi ufelwe yispani sonke.
“Amadonki aphonguqhuqhisa amakhanda nxa sesifa khonaphana , afile kimi lapha abangu 4 insuku zilandelana , ngazama ukuthi siwahlabe kukhanya kwasekuphuzile evele sesifa ,angikwazi ukuthi ngizalima ngani yinto engiyidingayo ukuthi ngizakwenzanjani amadonki ebengilima ngawo ngisikha ngawo ngenqola asefile yonke.”
Ukhansila kaWard 2 uNkosikazi Zwelibanzi Mpofu ongomunye walabo abafelwe ngamadonki uthi ayaphela amadonki esigabeni sabo.
“Sesifelwe ngamadonki amanengi kakhulu osekutshiye izakhamizi zididekile zingasakwazi ukuthi pho zenze njani?,ngoba amadonki yinyamazana eqakatheke kakhulu, uvuka ekuseni ucabanga idonki, yikukha amanzi yikulima ,konke nje esikwenzayo sikhangele ukuthi idonki yiyo ethwala umthwalo omkhulu ezakhamizini, asefile amadonki lami nginje ngomunye ofelwe ngamadonki kukanti izakhamizi zicabanga ukuthi amadonki lawa abulawa zintwala kumbe alezibungu esiswini.”
UMqondisi wohlangothi olubona ngokunakekela izifuyo eZansi yemaNdebeleni uMnu Enart Mdlongwa, uthi bona abakatholi mbiko ngokufa kwamadonki lawa esithi bazakuyafika khona bayehlola ukuthi angabe ebulawa yini.
Ukufa kwamadonki lawa kuza ngesikhathi inkomo lazo zisifa mahlayana nje ngenxa yemikhuhlane etshiyeneyo.
Kusenjalo izakhamizi zeManama kuWard 17 zidlela evalweni kulandela ukubonakala kwendlovu esigabeni lesi Ngolwesithathu.
UNkosikazi Thabang Nyathi oyisakhamuzi seGohole ngomunye obone lezindlovu.
“Kulendlovu ezifike lapha eNumber 9 zihamba ziyi 4 indlovu zakhona ezinkulu zibuye zivelela etshonalanga zaphenduka duze lomuzi wami zabuyela entshonalanga lapho ezivele khona.”
Ngalesisikhathi somnyaka indlovu zivame ukuhamba hamba zidinga amadlelo aluhlaza kanye lamanzi.
Lanxa kungela othe wahlaselwa yilezi ndlovu kwezinye iziqinti njenge Hwange sokuke kwaba lokufuthelana phakathi kwezinyamazana zendle labantu, kubangwa amanzi ikakhulu lamadlelo ezifuyo zabo.
Forum