Abanengi bayalisola kakhulu ibandla leZanu PF, ngokwalela ezinye intathelizindaba zenhlanganiso zezindaba ezizimeleyo okugoqela ezeVoice of America, ukuthi zithaphe izindaba eziphathelane lomhlangano wayo omkhulu eliwenza minyaka yonke.
Lumhlangano oqale Ngolwesihlanu uphela NgoMgqibelo mhlaka 28 Mfumfu, wenzelwa eGweru lonyaka.
Intathelizindaba ezalisiweyo zikhala ngokuthi bezilobele incwadi abeZanu PF, yokuthi zivunyelwe ukuyathapha izindaba kulumhlangano kusese lesikhathi zathenjiswa ukuyithola kodwa Ngolwesine zangayitholi imvumo.
Intathelizindaba uMandla Tshuma usola okwenziwe ngabeZanu PF.
"Kuyusibonele esingasihle ujwenqabela iNtathelizindaba ekuqhubemi umsebenzi ngoba lesisekelo sombuso siyabapha amalungelo okusebenza bengenqatshelwa. Ngikhuthaza amabandla ezombusazwe ukuba enganqabeli iNtathelizindaba ukusebenza ngoba kulilungelo likazulu ukwazi okwenzakalayo ezweni."
UMnu Ben Moyo isakahmuzi sakoBulawayo uvumelane loTshuma.
"Kuyamangalisa ukuthi ibandla elibusayo liyenqabela iNtathelizindaba ukusakaza ngoba kulihlazo ukuthi belibandla benqabele lNtathelizindaba ukusebenza."
Isikhulumi samapholisa iZimbabwe Republic Police uInspector Paul Nyathi ekhuluma lentathelizindaba koBulawayo emhlanganweni wokuhlaziya ubudlelwano bamapholisa lentathelizindaba laye usole ukufakelwa imigoqo kwentathelizindaba.
"Amapholisa alobudlelwano obuhle lentathelizindaba sekumele sihlale phansi sibelobudlelqano obuhle labezomvikela lamabandla ezombusazwe ukuze baphathe intathelizindaba ngokufanayo njalo bengabenqabeli ukuthapha indaba."
UMqondisi wezokwethulwa kwemibiko kuZanu PF, uMnu Farai Marapira uchaze ukuba yena ebevumile akasakwazi ukuthi abezomvikela bavimbenjani ukusebenza kweVOA.
"Ngayamukela kuhle incwadi ezivela eVOA DC zicela ukusakaza ngekhomfa yethu lami ngavuma kodwa angazi ukuthi kuhambenjani ukuthi incwadi ezibavumela ukusebenza zingasatholakali eGweru lapho obekumele bathole incwadi ezibavumela ukungena ekhomfa ngisaphakathi kokuphenya ukuthi sazi ukuthi kuhambenjani."
UMqondisi wohlangothi olweFAZ, uMnu Kudakwashe Munsanka laye uyakusola ukuvinjwa kweVOA ukuthapha izindaba ngalumhlangano.
"Sisebenza kuhle leVOA umasiqathanisa labanye ngoba balebalance kundaba zabo angilasizatho sokuthi kungani benqabele iNtathelizindaba zeVOA kumbe abaphezulu balesizatho sizadingisisa ngenyathelo labo."
Ingwetha leMisa Zimbabwe uNkosazana Helen Sithole uthi ibandla leZanu PF lephule isisekelo sombuso.
"Silusizi ngokuvalelwa kukaMaNdlovu loMusengi emhlaanganweni weZanu eGweru thina sikhuthaza ukulinganiswa kwamathuba okusebenza kuntathelizindaba njalo ngokwenqabela iVOA eGweru ibandla leZanu PF lephule isisekelo sombuso esivumela ukusebenza kweNtathelizindaba ezweni.
Inhlanganiso ezilwela amalungelo entathelizindaba ezigoqela oMISA, MAZ VMCZ lezinye lazo zikhiphe imibiko yokusola inyathelo elithethwe yiZanu PF lokwenqabela ukusebenza kwentathelizindaba ezizimeleyo kulumhlangano zisithi lokhu kwephula amalungelo azo akusahluko 61 lo62 sesisekelo sombuso.
Ingcwethi zomsebenzi wokwethulwa kwezindaba zithi ibandla elibusayo aliqalisi ukwenqabela intathelizindaba ekuqhubeni umsebenzi, ngoba ngeviki edluleyo licitshise ezinye zazo izithombe zikamsekeli kamongameli esiwa.
Ngo Ncwabakazi uhulumende walela imvumo intathelizindaba zeVOA ebezisuka eMelika ukuzothapha izindaba zokhetho olukhulu lokudinga umongameli, amalunga edale lephalamende kanye lamakhansila.
Forum