Umongameli Emmerson Mnangagwa, Ngolwesine, uvule okusemthethweni umbukiso wezomsebenzi wokwemba amatshe aligugu elizweni, wesimatshumi mabili lasithupha owe 26th Edition of the Mine Entra 2023, oqale koBulawayo Ngolwesithathu ozagqitshwa Ngomgqibelo.
Evula okusemthethweni lumbukiso wezokwemba amatshe aligugu oweMine Entra 2023, uMongameli Mnangagwa ukhuthaze abembi ukuba bengathengisi abakwembayo bengakakuhluzi lokukulolonga ukuze bathole inzuzo ephezulu kulumsebenzi.
"Umbukiso wezokwemba uhamba kuhle njalo lezokwemba zipha ilizwe imali kodwa ngilikhuthaza ukuba lingathengisi elikwembayo lingaqalanga lakuhluza lathola okunye okuligugu njalo lokhu kumele kwenziwe ngabalolwazi lemitshina eqotho."
Umqondisi weZimbabwe International Trade Fair uNkosazana Stela Nkomo abayibo abaqoqe umbukiso weMine Entra 2023 uchasisa ngobe kusenzakala.
"Umongameli Emmerson Mnangagwa uvule umbukiso okusemthethweni kuHall 2 njalo lonyaka inani lababukisayo kuhlanganisa lamazwe likhuphukile silamankampani angu 169 abukisayo sikhangelele ukuba sibesilokhe sikhula izinga lombukiso liqansa."
Amankampani amabili akweleSouth Africa athole imivuzo embukisweni walonyaka. Omunye wabathole umvuzo, uMnu Phillip Ngowera weGNK Valves yakwele South Africa uncome ukuhlelwa okwenziwe umbukiso walonyaka wezokwemba.
"Siyaqala ukubukisa lapha eMine Entra 2023 amaValves sisuka eSouth Africa njalo amaValves esiwenzayo alungele ukusebenza kumakhansili lasemigodini yokwemba amatshe aligugu sibonga lesicoco esisithole lapha sombukiso wempahla esiyilungisayo."
U-Dosman Mangisi omunye wabakumsebenzi wokwemba obesembukisweni walonyaka yena ubabaza ngezinga lemitshina ebukiswa eMine Entra lonyaka.
"Umbukiso walonyaka siyawamukela kakhulu abantu kumele babuye bazofunda njalo bathenge imitshina ezabanceda nanti izulu seliqalile ungananzelela sibelengozi ezinengi zemigodi lonyaka ngakho abankampani embayo engabambana asebenze ndawonye bengaphumelelela ingozi lazo zehle."
Umbukiso owe Mine Entra umanyanisa abakumsebenzi wokwemba, abamankampani alungisa imitshina abayisebenzisayo ukwemba, impahla yokuvikela izisebenzi ukuthi zingalimaleli emsebenzini kanye lamacebo okusebenza okungela ngozi.
UMnangagwa ovule okusemthethweni umbukiso oweMine Entra owenzelwa koBulawayo, uthi uhulumende wakhe ukhangelele ukuba umnyaka usiyaphela ilizwe libe selithole inzuzo emsebenzini wezokwemba engafika amabhiliyoni alitshumi lambili amadollar eMelika-US$12 billion.
Amankampani alikhulu lamatshumi phose ayisikhombisa-169 ayabukisa lonyaka eMine Entra 2023. Aba kulumbukiso ngabakulumsebenzi base Zimbabwe labavela kwamanye amazwe agoqela iBostwana, Tanzania DRC, China leSouth Africa.
Umbukiso walonyaka ugijima ngendikimba ethi “Accelerating Economic Transformation Through Mineral Beneficiation.”
Ingcwethi ezicungula ezenotho zithi umsebenzi wokwemba lokwethekelelwa kwelizwe yiyo imisebenzi ehamba phambili ekuletheleni ele Zimbabwe imali yakwamanye amazwe kanye lokuphathisa intuthuko yomnotho, ngenzuzo efika phose isilinganiso esingamatshumi ayisithupha ekhulwini, 60%.
Umsekeli kamongameli uConstantino Chiwenga lomphathintambo wezokwemba uMnu Soda Zhemu labo bebekhona umbukiso uvulwa okusemthethweni.
Ngolwesihlanu abeMine Entra bazaqhuba umhlangano wokudla kwekuseni oweBreakfast Seminar, ezakwenzelwa eRainbow Hotel, koBulawayo, ojonge ukuhlaziya ngesimo sezokwemba elizweni.
Kuzaba njalo lomhlangano wabembi abasacathulayo labazimeleyo kuHall 2 njalo umbukiso wangoLwesihlanu uvulelwe uzulu labosomabhizimusi.
Forum