Eminyakeni emine edluleyo uhulumende weZimbabwe ubika ukuthi umsebenzi wezoemigodi wenelise ukutholisa ilizwe amadollar aweMelika angamabhiliyoni alitshumi lambili-US$12billion, kodwa kungasiyo yonke engena esikhwameni sikahulumende kungena isilinganiso esithile sale imali kuyimithelo.
Lokhu kuphume embukisweni womsebenzi wokwemba, oweMine Entra 2023, ofike emaphethelweni lamhlanje koBulawayo.
Evula umhlangano wokuhlaziya ezokwemba elizweni oqhutshwe ngabeZimbabwe Chamber of Mines koBulawayo lamhlanje, umphathintambo wezokwemba uMnu Zhemu Soda ugcizelele amazwi kaMongameli Emmerson Mnangagwa entuthuko athi “Ilizwe lakhiwa ngabembi balo.”
"Siyalibonga lina lonke elikubhizimusi lezokwemba ngoba selenelise ukutholisa ilizwe imali yakweleMelika efika amabhiliyoni alitshumi njalo lokhu kuyajabulisa ngoba umongameli uthi ilizwe livele lakhiwa ngabembi balo."
Lokhu kugcizelelwe ngumabhalane wogatsha lwezokwemba uMnu Kunaka Pfungwa othi, kuyajabulisa ukubona ukuthi ukuthengiswa kwamatshe aligugu phandle kwelizwe lokutshalwa kwemali sekufike kuleso sibanga.
"Okogatsha lwethu siyazi ukuthi sesifikile kuzinga esasilisebenzela kusukela kuminyaka emine imali eya kuhulumende yitax hatshi yonke iUSD$12 Billion."
Kodwa ohlaziya ngezomnotho uMnu Busisa Moyo, ongumgcinisihlalo wenhlanganiso eye ZIDA njalo engumqondisi wenkampani eye United Refineries Limited uthi imali etholwe kwezokwemba ayeneli ukuthuthukisa lumsebenzi elizweni.
"Ezokwemba zidinga imali enengi njalo uhulumende lamabhanga asezweni ngeke enelisa ukuncedisa ukukhula kwamabhizimusi ezokwemba ezweni.
Kucwaningo olweziwe lonyaka olwe 2023 Survey Data luveze ukuba ezokwemba lonyaka ziphose zafika kutshumi ekhulwini 9.4 percent kumnyaka ozayo bakhangelele ukuthi inzuzo le yehle iye kusilinganiso sokuphansi kokuhlanu ekhulwini i4.3 percent.
Umqondisi webhanga leNEDBANK uMnu obesemkhosini wanamhlanje, umnumzana Harry Heresy uveze ukuba ibhanga lakhe lilakho ukuphathisa kulumsebenzi.
"Ibhanga lethu liyenelisa ukuncedisa amankampani ezokwemba ngemali ngoba sesikesakubonisa ekuqaleni."
Laloba ilizwe lithola inzuzo kwezokwemba abasebenza bezimele abemigodi emincane bakhala ngendlela abahlawulwa ngayo.
Omunye wabangene umhlangano wabembi abazimeleyo osuka eMatabeleland North uNkosikazi Lucia Msimanga uthi akubajabulisi ukuhlawulwa ingxenye yemali ngedola leZimbabwe.
“Sikhala ngokuthi singathengisa inzuzo yethu uhulumende asiholise ehlanganisa lamadola akuleli kukanti bonke esenza labo amabhizimusi bafuna ukuhlawulwa ngedola leMelika ngakhoke uhulumende kasidingele amankampani esizathenga khona ngedola lakuleli akusasebenzeki."
UMnu Philimon Mukeule oyemba iLithium legolide eGwanda uvumelane loMsimanga.
"Sikhala ngeRTGs efakwe yiFidelity uhulumende kakulungisise ngoba imitshina yethu lakho konke sihlawula idola lemelika okweRTGs asihambelani lakho."
Umbukiso owe Mine Entra 2023 umanyanise abakumsebennzi wokwemba, abamankampani alungisa imitshina abayisebenzisayo ukwemba, kanye labapha imfundiso yokusebenza okungadala Ngozi empakathini, lempahla yokuvikela izisebenzi ukuthi zingalimaleli emsebenzini.
Abaphatheke embukisweni walonyaka ngabakulumsebenzi elizweni jikelele labavele kwamanye amazwe agoqela iBostwana, Tanzania, DRC, China leSouth Africa.
Ingcwethi zenotho zithi umsebenzi wokwemba lokwethekelelwa kwelizwe ngomunye wemisebenzi osuhamba phambili ekuletheleni ele Zimbabwe imali yakwamanye amazwe kanye lokuphathisa intuthuko yezomnotho, ngenzuzo efika phose isilinganiso esingamatshumi ayisificaminwe mibili ekhulwini, 80 percent.
Umphathintambo wezokwemba uMnu Soda Zhemu lamhlanje ungene imihlangano obekuhlaziywa ngezokwemba lapho okwethulwe impumela yophenyo oluthi lobanje ezokwemba ziletha inzuzo ezweni kumnyaka ozayo kulakho ukwehla ngesizatho sokusilela kwamaandla kagetsi lokuwa kwentengo yamatshe aligugu emazweni.
Kumhlangano awungene labembi abasacathulayo laloba beletha inzuzo enengi ezweni uMnu Soda uchaze ukuba baphakathi kokulolonga umthetho omutsha ozalawula ezokwemba ezweni.
Forum