Ummeli omutsha wakwele Bhilithani eZimbabwe, uMnu Peter Vowles ube lomhlangano namhlanje, lonobhala jikele weZANU PF, uMnu Obert Mpofu wazisa ukuba ilizwe lakhe likhathazekile ngendlela ukhetho olwenziwa ngayo.
Uqhubeke ethi ele Bhilithani livumelana lalokho okwatshiwo ngumanyano oweSADC labanye ababuya bazohlola ukhetho luka Ncwabakazi abathi alwenziwanga kulandelwa ngemfanelo.
UMnu Peter Vowles ukhulume amazwi la esigodlweni seZANU PF lapho athe kumele uhulumende abone ukuba uyakhangelisisa okunye okwakhulunywa zinhlanganiso ezabuya zizohlola ukhetho lwe Zimbabwe.
"Sikhulume sikhululekile ngobudlelwano bethu njenge UK le Zimbbabwe. Ngikhulume ngisakutsho ngo Ncwabakazi, kodwa siphinde satsho lokhu okwakhulunywa yi SADC ngendaba zokhetho ukuba kumele kukhangelisiswe "
UMnu Vowles uqhubeke esithi ele Bhilithani lifuna ukuqinisa ubudlelwano balo lele Zimbbabwe esithi umbuso wentando kazulu uqakathekile kakhulu ukuze kufezeke lokhu.
Kodwa unobhala weZANU PF, uMnu Obert Mpofu wazise ukuba babe lomhlangano omuhle kakhulu esithi ibandla lakhe likhathazekile, ngezijeziso zomnotho athi zaakelwa ele Zimbabwe ngakhoke kumele zesulwe.
"Sikhulume ngezijeziso zomnotho, izikwelede zelizwe okumele zibhadalwe lokunye okunengi."
UMpofu uqhubeke esithi okunengi okukhulunywe kulumhlangano kulakho ukusiza ukuba ubudlelwano be Zimbabwe lamazwe afana le Bhilithani bube ngcono.
Kodwa umsekeli wesikhulumeli se CCC uMnu Gift Ostallos Siziba owebandla le CCC uthi amazwi awe Bhilithani ayajabulisa ngoba aveza ukuba kuyacaca ukuthi umhlaba wonke uyazi ukuba ukhetho aluqhutshwanga kuhle.
"Kuvele kusaziwa ukuba ibandla le ZANU PF laqila kukhetho njalo umhlaba wonke uyakwazi. Okukhulunywe ngu mmeli we Bhilithani siyakwamukela njalo sifisa ukuba kwaziwe emhlabeni onke"
Ingcwethi ezicubungula ezombusazwe kanye lenhlanganiso ezikumsebenzi wokulondolozwa kwamalungelo oluntu zihlala zisola ukonakala komumo wezombusazwe lokulondolozwa kwamalungelo oluntu e Zimbabwe zisithi uhulumende weZanu PF uhlala evala ngebhetshu evika ngezijeziso azithi zabekelwa ilizwe ngamazwe angentshonalanga agoqela eleBhilithani, Melika lamanye.
Forum