Inengi labesifazane abasemaphandleni babikwa beyibo ababhekana lohlupho lokuhlukunyezwa ngobulili ukwedlula abanye babo abasemadolobheni.
Ingcwethi zezenhlalakahle kazulu zithi lokhu kungabe kungenxa yamasiko kumbe ezinye izizatho ezingakhulunywayo.
Uphenyo olwenziwe yiStudio 7 luveza ukuthi abesifazane abanengi bayaqinisela nxa behlukuluzwa ezindlini lasemulini, beqiniswa ngabanye abathi yikho okwenzakala emendweni, besithi akula muzi ongathunqi intuthu. Izihlobo eziseduze kanye labangane yibo abakhuthaza lokhu becatsha ngamasiko.
Ingcwethi zezenhlalakahle kazulu zithi ukuhlukunyezwa lokhu kuvela endaweni ezinengi kusukela ekusweleni ulwazi ngendaba zokuhlukunyezwa lokhu lamalungelo abo, ukulandelwa kwamasiko, ukungaqakathekiswa kokufunda komntwana oyinkazana okudala ukuthi ngezikhathi ezinengi bendiswe besesebancane, ukuswelakala kwempendulo kubomama bemaphandleni embuzweni othi ngubani ozasinakekela nxa ubaba womuzi engabotshwa.
Unkosikazi Ntombikayise Mlalazi umhlali wakoBulawayo uthi akulula kowesifazane ukuyamangalela umkakhe.
“Umuntu engathatha omunye omfazi kuba lokuhlukuluzana, abantu bangasazwanani. Ubususithi mana ngibekezele engxenye kuyatshintsha, okunye kwale nje ukutshintsha. Uyabe suzwela lokhu okungabantwana susithi uhlalele bona kuphela. Kunzima ukuthi uhambe emapholiseni ubone kungcono ukuthi umtshiye kunjalo.”
Unkosikazi Patricia Tshabalala olwela amalungelo kazulu ukhuthaza ukuqiniswa komthetho ukuze nxa omangalayo abe lesiqiniselo sokuba uzathola usizo.
"Isikhathi esinengi omama emakhaya yabaswela ukukhuselwa njalo indawo zokuyamangala zilobukhatshana thize njalo kulokwethuselwa okubenza babe ngabantu abalokwesaba. Kodwa ukubotshwa umuntu avalelwe kumbe abhadale i fine, Ane phambili komthetho yikho okwenza umuntu acine eqondile. Ngoba nxa umuntu engekelwa wenza akufunayo. Umthetho kawuqiniswe ngoba kwesinye isikhathi omama bathi langaze bamangale, kuyabhadalwana izimali kukhulunyiswane ucine usala uyisithutha wena otshayiweyo.”
Umnumzana Thomson Maseko okhangele isigaba seMatabeleland North enhlanganisweni eye Padare/Enkundleni Men’s Forum on Gender uchasisa ngezizatho ezenza ukuba omama abasemaphandleni bengamangali udlame abahlangana lalo.
“Owesilisa uba lenkangelelo alazo okumele zigcwaliswe ngumama, umama laye abe lenkangelo alazo okumele zigcwaliswe ngubaba. So omunye nxa esethe wehlukela ukugcwalisa lezi nkangelelo yikho lapha okudala ukuba kube lodlame, abantu batshayane kube luthuli. Nxa amacala esethe abakhona esikhathini esinengi yikuthi awafikiswa emapholiseni. Kwesinye isikhathi kuvamile ukuthi umsolwa sebotshiwe babuye bamlandele becela ukuthi akhulume, sebenika izizatho ezitshiyeneyo kanti ke isizatho esikhulu singesokuthi nxa umuntu lo engabotshwa thina sizakudlani. Lumuntu uyaphuma ayeqhubeka ehlukuluza umama.”
Uqhubeka uMaseko ethi kulabesilisa labo abahlukulizwa ngobulili kodwa esikhathini esinengi bethandabuze ukuyamangala ngoba kubayangisa.
“Obaba abanengi bakholwa ukuthi izinqumo zonke zemizi kumele zithathwe yibo, kuze kuhlanganise lezokuya ecansini. Ilizwi likamama alibalwa. Kodwa lanxa kunjalo bakhona obaba abahlukulwa ngomama. Mhlawumbe yikho futhi okubangela okwanda kwenani labobaba abazibulalayo. Bona ke, bakhala ngokuthi emapholiseni bayahlekwa nxa besiya mangala. Kodwa siyabonga ugatsha lweVictim Friendly Unit olwamukrla ukuhlukuluzwa kwabobaba ngengendlela efanayo lokuhlukuluzwa kwabomama. Ngikhuthaze obaba ukiba kasitshintsheni i-mind set, sekele ukuba ngubaba oyisilwane kodwa sibe ngabangane lamakhosikazi ethu.”
Isikhulemeli samapholisa uAssistant Commissioner Paul Nyathi ekhuluma lentathelizindaba ukhuthaze abantu ukuthi baqonde kungatsha zamapholisa ezikhangele abahlukunyezwayo, ezamaVictim Friendly Units ezisenkambeni zamapholisa elizweni lonke.
Ngokufanayo, ugatsha lwenhlanganiso yomanyano wamazwe womhlaba olweUNICEF luthi abantu abayisilinganiso samatshumi amane ekhulwini, (40%), abaphakathi kweminyaka alitshumi lanhlanu kusiya kwangamatshumi amane lasificamunwemunye lihlangana lokuhlukunyezwa ngobulili empilweni yabo.
Ngokunjalo, ukuhlukunyezwa ezindlini kubikwa kungelani lobulili ngoba abesilisa labo behlangana lokuhlukunyezwa lokhu kodwa bethula, belimalele phakathi.
Forum