Iqula lamazwe aseEurope elahlola ukhetho lweZimbabwe olwenziwe ngoNcwabakazi, eleEuropean Union Election Observer Mission, namuhla lethule umbiko walo wokucina ogcweleyo phezu kokhetho lolu, lagcizelela ukuthi aluqhutshwanga kuhle lolukhetho njalo amalungelo oluntu kazange ahlonitshwe.
Ekhuluma lentathelizindaba emhlanganweni owenzelwe enkundleni yebulenjini, eyeZoom, eseBrussels, isiphathamandla seEuropean Union, uMnu Fabio Massiimo Castaldo ugcizelele asebeke bakukhuluma ukuthi ukhetho lolu kaluqhutshwanga kulandelwa izinqondiso zomhlaba ezilawula ukhetho olukhululekileyo ngenxa yezehlakalo zokuhlukuluzwa kwabantu phambilini kokhetho langemva kwalo.
"Ungakhangela ukuzphatha kweFAZ leZEC lendlela ukhetho olwaqhutshwa ngakhona lathi sasesasuka akukho kusilinganiso sezinga lokhetho uma sikhangela izimiso zaamazwe omhlaba kwezokhetho njalo thinaa besiqopha ukhetho siphume leziqondiso ezingenza ukhetho oluzayo lubengcono kulalokhu esakubonayo engingakaze ngikubone lokhe ngangena kwezombusazwe iZEC kumele ikhululeke ingalawulwa ngamabandla ezombusazwe."
UCastildo wengeze wathi umanyano weEuropean Union uzaqhubeka umise uhlelo lwawo lokuphathisa ikomishini yezokhetho, iZimbabwe Electoral Commission ngemali engena kuzigidi lezigidi baze basuthiseke ukuthi likhomishini isiqhuba ukhetho ihlonipha izimiso ezilandelwa ngamazwe alombuso okhululekileyo.
lsikhulumi seCitizens Coalition for Change koBulawayo uMnu Swithern Chirowodza uncome abeEU ngombiko wabo.
"lnhlanganiso yeEuropean Union itshaye ekhanda kukho konke ekukhulume ngokwenzakala kukhetho njalo leziqondiso zabo ziyazamukela ngoba konke abakutshoyo kusobala kuyewonke umuntu emhlabeni jikelele."
lsakhamuzi sakoBulawayo uMnu Menzi Nkomo uthi kuqakathekile ukuthi uhulumende laye alalele izixwayiso zeEU ukuze aqondise amaphutha awenzayo ekuqhubeni lolukhetho.
"Sengizwile okwethulwe yiEU mayelana lokhetho siyakwamukela kodwa sicela uhulumende alandele kuhle iziqondiso ezethuliweyo ukuze sibelokhetho olubalulekileyo ezweni kuminyaka ezayo."
Isikhulumeli sebandla leZanu- PF uMnu Farai Marapira yena utshele iStudio 7 ukuthi umbiko weEU awubakhathazi ngoba ukhetho kudala lwadlula.
"Asikhathali ngempumela yeEU mayelana lokhetho ayilani lathi ngoba thina saqhuba kuhle ukhetho bayabtshuma labo ngokwabo lokho."
Besethula lumbiko abeEU Election Observer Mission, bafake imicijo engamatshumi amabili lanye-21, yokucebisa uhulumende ngendlela amele aphathe ngayo ukhetho. Bathe kumele kuguqulwe umthetho weMaintenance of Peace and Order ngoba ulokuncindezela thize abakubone ngesikhathi sokhetho.
I ZEC bathi kayimelanga ilawulwe ngamabandla ezombusazwe njalo kumele yethule impumela yokhetho ngesikhathi. Bakhuthaze njalo ukuba uhulumende abelendlela ebalulekileyo yokuqhatsha abahluleli bemithethwandaba ukuze ingasetshenziswa ukuphazamisi inhlelo zelizwe njalo kungabi lokuhlukuluzwa kukazulu.
Forum