UMongameli Emmerson Mnangagwa wethule amazwi akhe emhlanganweni wokucebisana phezu kokuguquka komkhathi oqhutshelwa eDubai, oweCOP28, ngoMgqibelo wazitshaya isifuba ngohlelo lokulima ngogatshopo kumbe ukugebha amagodi, olwePfumvuza/Intwasa.
UMnangagwa uthe isivuno seZimbabwe sesikhuphukile ngenxa yaloluhlelo.
“Ngenxa yokuguqula komkhathi, eleZimbabwe lamukele uhlelo lokulima ngendlela ekhaliphileyo olwePfumvudza/Intwasa njengenye yezindlela zokuqeda indlala,” kutsho uMnagagwa.
“Ngenxa yaloluhlelo, sesilesivuno esihle kanti lezimuli ezinengi lazo azisahlaselwa yindlala futhi sezisenelisa ukuthola inzuzo ekulimeni.”
Phansi kohlelo lwePfumvudza/Intwasa, abantu balima ngokugebha amagodi ngamakhuba okuhlakula kumbe amapiki izulu lingakani, besebehlanyela nxa lingana.
Lanxa bekhona abaluncomayo kakhulu loluhlelo njengoMnangagwa, abanye bathi lulimaza abantu imizimba ngokugebha bekhotheme. Ngokunjalo, bathi uhulumende kumele aqakathekise inhlelo zokulima ngamathalakitha.
Ngaphandle kwabakhokheli bamazwe omhlaba, umhlangano weCOP28 lo ungenwa yiziphathamandla ezenhlanganiso zamazwe atshiyeneyo okugoqela ezeZimbabwe lezebandla leCCC ezifana loMayor wakoBulawayo uMnu David Coltart.
Forum