Ingcwethi zeZimbabwe ezikumsebenzi wezempilakahle zikhala ngokuqonga kwenani labesifazane asebetholakala belegcikwane elengculaza ele HIV-AIDS, ngalezi nsuku.
Imbangela yalokhu zithi yikusilela kwemfundiso yamalungelo kwezocansi, ubumpofu kanye lokuncidezelwa kwabasifazane nje, ikakhulu kulabo abangaqondisisi amalungelo abo labaphila ngokuthengisa ucansi.
Abogatsha lwezempilakahle bathi kunani labantu abazinkulungwane eziphezu kwezilitshumi lasikhombisa-17,300 abahlolwa batholakala belegcikwane lengculaza, ngomnyaka ophelileyo, abazinkulungwane ezilitshumi-10,000 babo, ngabesifazane abasakhulayo.
Ekhuluma embuthanweni owe World Aids Day ngeviki edluleyo, umkaMongameli welizwe, uNkosikazi Auxilia Mnangagwa uveze ukukhathazeka kakhulu ngalimpumela, ethi abesifazane isikhathi esinengi bancindezelwa ngabesilisa, phansi komkhuba omubi oqhubeka usidla ubhedu, wokuhlukunyezwa kwabo ezimulini, oweGender Based Violence.
“Liqhubeka liletha lesisilo emakhaya, ngakho omama balamuhla bathi kwanele. Njalo phezu kwalokhu alifuni kuvikela, lithi sisinde kanjani, sikhusele kanjani usapho ngoba lesisilo siyabulala.”
UNkosikazi Sithandekile Mlauzi okumsebenzi yemfundiso yokuvimba ukuthelelanwa lula kwegcikwane leHIV esabelweni Matabeleland North, ekunhlanganiso ezimeleyo eye Zimbabwe National Network of People Living With HIV uthi lokhu kubangelwa yibufitshane bengalo kwabesifazane, kanye lokungazi amalungelo abo mayelana ngezocansi.
“Uyathola umuntu ongumama esehluleka ukuzimela ngezocansi oluvikelekileyo ngenxa yokuthi yikho lapho athembele khona, yikho lapho aphiwa khona imali kungabe kusemendweni kumbe loba ngaphi.”
Ukwehlisa lokhu njengenhlanganiso bathi sebesungule inhlelo zokufundisa abesifazane ngamalungelo abo, kanye labangakwenza ukuzivikela kulumkhuhlane.
“Esizama ukukwenza yikuthi sincedise omama kakhulu ngendlela zokuzimela loba umuntu umkakhe engafuni asebenze. Siyazama ukubaxhuma labanye ukuthi benze inhlelo kanye lemisebenzi yangekhaya yezandla ehlukeneyo.”
Phezu kwalokhu,umqondisi wohlangothi lwe National Aids Council esabelweni lesi, uMnumzana Dingani Ncube, uthi uhlangothi lwakhe, lule nhlelo zokunquma elizweni lonke befundisa ngabantu ngegcikwane leli kanye lokuhlola igazi ezigabeni ezinzima ukufinyelela.
“Ngemva kwalokho sebengathola usizo lwemithi yokuncedisa amasotsha omzimba kulabo asebephila le-HIV ama ARVs kumbe ekutheni bethole izixwayiso zokuthi bengaziphilisa njani bengabanjwa ligcikwane leHIV.”
Ngokutsho kwenhlanganiso yezempilakahle kazulu emazweni womhlaba, eye United Nations International Children’s Emergency Fund, ele Zimbabwe lilezizalwane ezedlula isigidi esisodwa-1.3million, eziphila leHIV, inengi liabo kungabesifazane.
Bathi kusasilela njalo ukuthi omama abazithweleyo bavikelwe, njalo labesilisa labo bakhuthazwe ukuhlolwa igazi ngoba abalegcikwane behamba belisabalalisa ngokungena emancansini labesifazane abasakhulayo bengela Ndlela zokuzivikela.
Kunje inhlanganiso yezwekazi le Africa eye International Conference on Aids and STIs-ICASA iqhuba umhlangano esigodlweni seHarare kucutshungulwa indlela amazwe la, angehlisa ngayo izinga lokuthelelanwa kwaleli gcikwane lengculaza, ingulamakhwa kanye lofuba, besithi inengi labantu kuzwekazi leli lizithola ligula okunye loba okubili kwalokhu.
Forum