Luqhubeke kuhle langokuthula ukhetho lwamaBy-elections lokudinga amalunga edale lephalamende lamakhansila koBulawayo endaweni ezifinyelelwe ngumsakazo weStudio 7.
Lolu khetho lwenziwa ukuthatha izikhundla ezasala zingela bantu ngemva kokuxotshiswa edale lephalamende kwamalunga awebandla eleCCC, kanye lamakhansil ngozithi ungunobhala jikelele walelo bandla, umnumzana Sengezo Tshabangu.
Abantu abaphumanga ngobunengi ukuyavota kumaBy-elections akoBulawayo namhlanje, inengi lisithi kalizihluphanga ngokwenza njalo ngoba kuyikudlalisa isikhathi.
Amagama amalunga awebandla leCCC abakucele likaMnu. Nelson Chamisa abakhutshwa ngabeZimbabwe Electoral Commission, emaphepheni okuvota, amaballot papers, NgoLwesine ngemva kwesinqumo seHigh Court sokubavimba ukuncintisa kulolu khetho, abengeko, bekulabakucele lozithi ungunobhala jikelele walelo bandla, uMnu Sengezo Tshabangu.
Amakhansila akucele lika Chamisa ebekhona kuphepha lokuvota abakhutshwanga yiZimbabwe Electoral Commission ngesizatho sokuthi amagama abo abengekho kuluhlu lwabavinjwa ukuncintisa kusinqumo esethulwe yiHigh Court NgoLwesine.
Ekhuluma ngemva kokuvota eMahlabezulu Primary School eTshabalala kuWard 21, omele ibandla leCitizens Coalition for Change, ekucele likaChamisa, uMnu Tinevimbo Maphosa uthi bavote ngokuthula.
"Ipolling station zonke kusiqinti sami zivulwe ngesikhathi lami ngivote kuhle ngokuthula njalo akulanswendwe okunzima yikuthi inani labantu asebethe bavota liphansi."
Okhokhela abahlola ukuqhutshwa kokhetho emele iCCC, kuWard 21 uNkosikazi Sibongile Chimumba uchasisa kabanzi ngobekusanzakala.
"Ukhetho luqale ngo7am ekuseni njalo sikhangelele ukuvala ngo7 ntambama. Okungihluphayo yikuthi ukhetho lolu lungehlisile njalo abantu abaphumanga ngobunengi ukuzovota."
Okhokhela ukuhlolwa kokhetho emele ibandla leZanu Pf kuWard 1 enzikini yedolobho, uNkosikazi Thokozile Mudimba uthi abala nsolo asebethe bayithola ngokhetho lwanamhlanje.
"Ukhetho lolu lwamaby elections luqale kuhle kuWard 1 njalo kuqalwe ngesikhathi. Kusiqinti sami ngilendawo zokuvotela ezingamatshumi amabili lanye kubenjalo labahlola ukhetho bemele ibandla lami amangamatshumi ayisithupha lantathu. Indlu yokuvotela ilamalunga ethu amathathu njalo labo akukabi lensolo asebethe bayiletha kimi."
UMnunzana Pardon Tapfumaneyi oncintise kukhetho lolu ezimele edinga ukuba lilunga ledale lephalamende, esigabeni seMpopoma Mzilikazi yena uthi uvotele eLukhanyiso Primary School eMpopoma.
"Ngivote kuhle njalo akulandwendwe kulokuthula koBulawayo njalo ngikhangelele ukunqoba buye ngwsikhathi sikhankasa akulabandla kumbe umuntu obehlukuluza abanye."
Abekhomishini eqondisa ezokhetho eyeZimbabwe Electoral Commission bethule umbiko othi ukhetho luqhubeke kuhle ngokuthula njalo impumela yokhetho izaphanyekwa kumaCommand Centres ngendawo ngendawo njengokuvota kwabantu lamhlanje.
Abenhlanganiso ekumsebenzi wezxamalungelo okuvota, eye Electoral Resource Centre Africa bakhuphe umbiko lamhlanje emini, enkundleni ezehlukeneyo zokuxhumana ukuba ngesikhathi semini abantu abangaba yisilinganiso esiphezu kokuficaminwe mibili ekhulwini i8.4 percent koBulawayo bebesebevotile.
Abe ERCA baqhubeke bethi eBulawayo South emini enkulu besekuvote abantu abangaba yisilinganiso phose abayisificamunwemunye ekhulwini- i8-7 percent, kuthi eCowdray Park besekuvote isilinaniso sabedlula abayisikhombisa ekhulwini-7,1 percent.
Esigabeni seLobengula Magwegwe besekuvote isilinganiso sabayisificamunwe munye ekhulwini i9 percent, eMpopoma Mzilikazi besekuvote abaphose bafike itshumi ekhulwini i9,3 percent. Esigabeni seNketa besekuvote abedlula isilinganiso sabayisikhombisa ekhulwini i-7.6 percent.
Forum