Ibhanga elikhulu lomhlaba eleWorld Bank lithi umnotho weZimbabwe ukhule ukwedlula owamazwe atshiyeneyo asezansi yeAfrica lonyaka laseminyakeni emibili edluleyo, okugoqela oweSouth Africa, oweZambia loweMozambique.
Lokhu kuphume kugwalo olwethulwe libhanga leli ngoLwesithathu.
Loba kunjalo, lelibhanga lithi umnotho weZimbabwe uzancipha ukhule ngesilinganiso sokuthathu okulengxenye kuphela ekhulwini, 3.5 percent ngomnyaka ozayo, okuyisilinganiso esivunywa nguhulumende.
Lonyaka iWorld Bank ithi umnotho weZimbabwe ukhule ngokune okulengxenye kuphela ekhulwini, 4.5 percent kodwa uhulumende uthi ukhule ngokuhlanu okulengxenye, 5.5 percent.
IWorld bank ithi ukuncipha komnotho lokhu ngo2024 kuzabangelwa yizinto ezitshiyeneyo ezigoqela ukoma komkhathi okuzaletha indlala emangalisayo.
Usomabhizimusi olilunga leCCC uMnu Abednico Bhebhe utshele iStudio 7 ukuthi okukhulunywa yiWorld Bank akuhambelani lodubo abantu beZimbabwe ababhekane lalo.
Kodwa omunye njalo usomabhizimusi olilunga leZanu PF uMnu Believe Gaule uthi ububelo buyabonakala lanxa nje evuma ukuthi abantu abanengi bathwele nzima.
Isiphathamandsla senhlanganiso emela abathengi eyeNational Consumer Rights Association uMnu Effie Dlela Ncube yena uthe impilo izaba lukhuni ebantwini abanengi eZimbabwe njengoba izulu lingananga.
Forum