Abekhansili yakoBulawayo bamanyane labenkampani elinda izimota enzikini yedolobho, eyeTendy Three Investment, bathethe ithuba lekhefu ele Unity Day, lokwabela abantu abaswelayo izipho zekhisimusi.
Abanye koBulawayo bacine benanza usuku olweUnity Day ngokwabelwa izipho zeKhisimusi yinkampani elinda izimota enzikini yedolobho, eye Tendy Three Investment, ezibiza inkulungwane ezingamatshumi phose amabili lanhlanu amadola aweMelika-US$24,500.
Esipha isipho sokudla kuzakhamizi eziyinkulungwane eyodwa, umqondisi weTTI uMnu Lizwe Mabuza uthe uzakuyakupha abasemaphandleni isipho esifanayo.
"KoBulawayo sizakupha abantu abayinkulungwane eyodwa njalo kuzabiza $24 500 ngokunjalo lemakhaya sizahambisa okufanayo ukuze kufanane sibonga abahlawulela ukupaka imota zabo enzikini yedolobho ngoba yibo abenze sathola imali yokulthengela impahla esiliphe zona lamhlanje."
Umsekeli kaMayor edolobho lakoBulawayo uKhansila Edwin Ndlovu ubonge isipho esivele kunkapnani yeTTI ethi njengekhansili bebengeke benelisa ukupha okuhle kangaka.
"Minyaka yonke lokhe baqala ukusebenza koBulawayo iTTI iyapha abantu bakoBulawayo ikhisimusi njalo abaphelili lapho baqhatshe labantwabethu kuthi abanye babo bayabhadalelwa esikolo. NjengoBulawayo Siyabonga isipho esihle lingadinwa lakusasa."
lsakhamuzi sakoBulawayo uMnu Simon Mbiba ohla eB/F 204 ubonga ukukhunjulwa.
"Sibonga ukukhunjulwa ngabeTTI abazukulu labo bazakudla izisu zise zivuvuke."
UNkosikazi Ellis Ngwenya uthi uyabonga uthole impahla evele iqakathekile emakhaya.
"Silokujabula okukhulu lokubonga abenkampani yeti ngesipho samabasic goods avele edingaka emakhaya Siyabonga ukukhunjulwa ngabantwabethu ngelanga leUnity Day.”
lkhansili yakoBulawayo imanyene lamankampani ahlukeneyo edolobheni leli aseqalile ukutholisa abantu ikakhulu abaswelayo izipho zekhisimusi. Lamhlanje imanyane lenkampani eyeTTI ukwabela izakamizi zeLobengula, Mzilikazi, Entumbane, Emakhandeni Luveve, Magwegwe Pumula, Mpopoma, Tshabalala, Nkulumane lakumaEastern Areas abayinkulungwane eyodwa ukudla kwekhisimusi.
Forum