Uzulu ezigabeni eziyisithupha uyavota ngoMgqibelo kukhetho lwama-By-elections, olokudinga amalunga edale lePhalamende amatsha kulandela ukuxotshiswa kwalawo ayekhona aweCCC nguMnu Sengezo Tshabangu.
Umthethwandaba weSupreme Court uvimbe amalunga aweCCC edlula amatshumi amabili ukuthi ancintise kulolukhetho agoqela uMnu. Ostalos Siziba.
Ukhetho lwaNgomgqibelo lwenziwa ezigabeni ezibalisa iPhelandaba-Tshabalala, Mkoba North, Chegutu West, Zvimba East, Seke laseGoromonzi South.
Ikhomishini ebona ngezokhetho eyeZimbabwe Electoral Commission ithi isilungele ukuqhuba lolukhetho lapho ibandla leZanu PF elikhangelelwe ukunqoba ngoba amalunga ebandla leCCC ebelisekelwa nguMnu Nelson Chamisa, yena osephume kulelibandla, eyalisiwe ukuncintisa yimithethwandaba ngemva kokuvinjwa nguMnu Sengezo Tshabangu, yena ozithi nguye unobhala jikelele weCCC.
Lokhu kutsho ukuthi abazancintisa kuBy-election, ngabecele leCCC elisekela uTshabangu, abeZanu PF kanye lamalunga azimeleyo.
Inengi lithi kusobala ukuthi ibandla leZanu PF lizanqoba kullukhetho, okuzadala ukuthi lithole izihlalo ezaneleyo ePhalamende ezilipha amandla okuguqula imithetho kanye lesisekelo sombuso welizwe santando, itwo-thirds majority.
lsakhamuzi sakoBulawayo uMnu Maluba Mhlaba usola amabandla aphikisayo ngokulwisana wona wodwa, ikakhulu eleCCC.
"Amabandla aphikisayo asezimvemve okuzakwenza ukuthi ibandla leZanu- PF libelamandla okwenza umathanda edale njalo uChamisa nguntando kayiphikiswa."
Ohlaziya ezombusazwe uMnu Effie Ncube laye uthi ukhathazekile ngezombusazwe elizweni njalo uthi ngabe umthetho wokuxotshisa amalunga ePhalamende uyaguqulwa.
"Ezombusazwe ezweni azimanga kahle ngabe kuyavuma kulungiswe umthetho oxotsha amalunga edale ephalamende."
Kodwa kulabanye abakhanya beledlabuzane lokuya vota Ngomgqibelo, abafana lesakhamuzi sePhelandaba-Tshabalala uMnu Moses Moyo.
"Kusasa ngizenelisa ukuyavota ngenelisile ukuyahlola ibizo lami belikhona."
Isikhulumeli secele leCCC elisekela uTshabangu, uMnu Alfred Dzirutwe uthe sebelungiselele ukuyavotela amalunga abo kusasa.
"Sesilungele ukuyakukhetho kusasa njalo abavotayo bathembisile ukuthi bazaphuma ngobunengi njalo sikhangelele ukunqoba."
Isikhulumeli sebandla leZanu-PF uMnu Farai Marapira laye uthi sebelungele lolukhetho ukuze babe lamalunga amanengi ePhalamende njalo bathole i Two-Thirds Majority.
"lbandla lethu lizanqoba kukhetho asilani lokuxokozela okukubandla leCCC ngoba sikhangelele ukuba lamalunga amanengi edale okuxakwenza sibuse kuhle sibele Two Thirds Majority edale lephalamende."
Kunje uzulu wakoBulawayo uthi udanile kakhulu ngokudazuka phakathi kweCCC ngemva kokuxotshiswa kwamalunga alelibandla ePhalamende lakumakhansili nguTshabangu, okwenze umkhokheli walo uChamisa wacina ekhalala ephuma kulelibandla esithi selingenwe zimpehlane.
Ukwaliswa kwabeCCC ebikhokhelwa nguChamisa yiHigh Court ukuthi bancintise yinto esolwe kakhulu ngabanengi.
Igwetha leCCC uMnu Nqobani Sithole uchasisa kabanzi ngalesi sinqumo.
"Lamhlanje idale leSupreme Court libalandulele ababemelana lokumiswa kwabo ukungena kukhetho njalo kusasa abantu bayavota abantu bayabe bekhona kuphepha lokuvota."
IZimbabwe Electoral Commission ikhuthaza abazavota Ngomgqibelo, ukuthi bahambe lezithupha kumbe ama-passport ukuze benelise ukuvota.
Forum