Ikhomishini ebona ngezokhetho eye Zimbabwe Electoral Commission ithi ukhetho lwama by elections olokukhetha amalunga edale lephalamende amathathu lamakhansila angamatshumi ambili luqhutshwe ngokuthula ezigabeni zelizwe ezitshiyeneyo kulenani eliphansi labantu abaphume ukuyavota. Ibandla le Zanu PF liding ilunga ledale lephalamende elilodwa nje kuphela ukuthi lenelise inani lamalunga angaguqula isisekelo sombuso.
Kwenye indawo yokuvota kulabantu abangamatshumi ayisikhombisa, 69 khona kubhalise abantu abangamatshumi afika phose inkulungwane, 850.
Ukhetho lolu lwenziwa ngemva kokuxotshwa ezikhundleni kwamalunga abandla le CCC ngozithi ngunobhala jiklele webandla le CCC, uMnu. Sengezo Tshabangu okutsho ukuthi abamela lelibandla ngabakhethwa ngu Tshabangu lexuku lakhe.
Ukhetho lolu luqhutshwa ePelandaba Tshabalala, Seke, Chegutu, Goromonzi. South lako Zvimba.
l-ZEC iqale ukhetho ngesikhathi koBulawayo esihleliweyo. Ozancintisa emele ibandla leZanu- PF koBulawayo esigabeni sePelandaba Tshabalala lapho okwasuswa khona uMnu. Gift Ostallos Siziba, uMnu Joseph Tshuma utshele i-Studio Seven ukuthi balethemba lokuthi bazanqoba lamhlanje ngoba ibandle eliphikisayo lingahlelekanga.
'Ibandla lethu lisebenzile sikhangelele ukunqoba ngoba ibandla eliphikisayo liyaxokozela lobengumongameoi wabo ubabalekele ngakho abantu bazakhetha ibandla lethu ngoba lihlelekile abaphikisayo badlala ngesikhathi."
Ozancintisa emele ibandla le-CCC ePelandaba- Tshabalala uNkosikazi Moreblessing Tembo ukhala ngenani eliphansi labantu abaphuma besiyavota.
"Abantu bavote kuhle ngokuthula kodwa inani eliphume lisiyavota liphansi kakhulu "
Isakhamuzi sesigaba sePelandaba Tshabalala uMnu Njabulo Nyathi uthi uhlolile igama lakhe walithola njalo uvotile.
"Ibizo lami ngilihlole ngalithola likhona kuVoters Roll ngivote kuhle kodwa inani labantu abavotileyo liphansi."
Isikhulumeli secele leCCC elabo Mnu. Tshabangu, uMnu Alfred Dzirutwe uthi bakhangelele ukubhuqa ibandla elibusayo lobanje inani labantu abaphume ukuyavota liphansi.
"Kuvotwe ngokuthula lobanje inani labaphumileyo liphansi ngoba abayalelwe ukuvotelwa abalalanga behamba besithi abantu bengayivota kumbe bavotele iZanu."
Isikhulumeli sebandla leZanu- PF uMnu Farai Marapira uthi labo bazanqoba badlulise inani Two-Thirds Majority edale lephalamende bazibusele kuhle bengethuki ibandla eliphikisayo.
"Ibandla lethu lizanqoba asikuthandabuzi sidlule i-Two Thirds Majority edale ukuze sibuse singethuki ibandla eliphikisayo."
Umsekeli kaMayor wedolobho lakoBulawayo uKhansila Edwin Ndlovu uthi kuvamile ukuba ibandla elibusayo linqobe ku By Election eZimbabwe ngezizatho ezithile.
"lnani labantu bavame ukuba balutshwana abayavota kuBy- Election njalo ibandla elubusayo ngezikhathi ezinje bayanqoba ngamavoti aphansi ngoba abantu bayabe bengaphumanga ngobunengi bayavota kuthi abeZanu banqobe."
Ukhetho lolu luqale ekuseni ngehola lesikhombisa njalo lwagqitshwa ngehola lesikhombisa ntambama.
Impumela ebisiphumile itshengise ukuba ibandla le Zanu PF selinqobe ezigabeni ezimbalwa ezibalisa Zvimba East, Checgutu le Norton.
Forum