Umphathintambo wezamanzi lokulima, uMnu. Anxious Masuka uthi isicelo sikamanisipala wedolobho lakoBulawayo sokuba ukusilela kwamanzi kulelidolobho kuthiwe yisimo esimele silungisiswe ngesiphangiphangi, inational emergency, sizakhangelwa ngemva kophenyo oluzenziwa yikhomidi eyakhethwa lugatsha lwakhe.
Ekhuluma lentathelizindaba namuhla ko Bulawayo lekhomidi ebona ngezamanzi eye Technical Committee on Improving Water Supply, uMasuka uthe mpela udubo lwamanazi koBulawayo, ikakhulu lumnyaka, lukusibanga esiphezulu.
UMasuka uthi ikhomidi ephenya udaba lwamanzi ako Bulawayo isingezelelwe amalanga alikhulu ngemva kwamanye alikhulu eyayiwaphiwe.
Kusenjalo, idolobho lako Bulawayo liqhubeka libhekene lodubo lwamanzi lapho izakhamizi eseziqeda phose inyanga ezithile zingelamanzi aphuma empompini.
Umanjinela wekhansili yakoBulawayo uMnu. Sikhumbuzo Ncube uthi okwamanje amadamu akoBulawayo asesele lesilinganiso samanzi afika amatshumi amane lantathu ekhulwinini- i43 percent.
UMphathintambo wedolobho lakoBulawayo uNkosikazi Judith Ncube uthi osekungezelele udubo lwamanzi.
yikwebiwa kwempompi eNyamandlovu isekwehlise inani lamanzi abuya koBulawayo.
Isakhamuzi sakoBulawayo esihlala eCowdray Park uNkosikazi Patricia Mpofu uthi sebelesikhathi eside bengelamanzi njalo lempompi ezithwala amanzi engcekeza sezidubukile.
UMgcinisihlalo weBulawayo Residents Association uMnu Winos Dube usecele ukuba uhulumende angenele atholise idolobho amanzi.
UMayor wedolobho lakoBulawayo uMnu. David Coltart usecele uhulumende ukuba abancede ngokubalungisela impompi ezidonsa amanzi ukuze ikhansili yenelise ukutholisa uzulu.
Umphathintambo wezamanzi uMnu Masuku lamhlanje uhlangene loSenator Coltart loSenator Ncube bebonisana ngokuthi kungenziwani ukuba idolobho lincedakale masinya ekutholisweni amanzi.
Okwamanje uhulumende uphakathi kokuhamba egebha izibholane izwe jikelele emizameni yokutholisa uzulu amanzi kulandela isomiso esikhona ngenxa yokuguquka komumo womkhathi.
Forum