Abesifazane abanengi, kanye lenhlanganiso ezilwela amalungelo abo eZimbabwe, bathi lanxa kulusuku lokunanza imisebenzi eyenziwa ngomama, olwe International Women’s Day, inengi labo lincidezekile, ikakhulu ekutholeni amathuba emisebenzi ephathelane lobukhokheli, ukudlwengulwa kanye lokuhlukumezana amakhaya, i–Gender Based Violence. Bakhala njalo ngokwendiswa kwamantombazana besese bencane.
Omunye wabomama laba nguNkosikazi Charity Moyo oweLupane othi umthetho kahulumende kufuze uqiniswe, ikakhulu ekubavikeleni.
“Abantwana bayahlukunyezwa, bacina bengena emendweni bebancane bengakafundi.Sinje lathi sahlukunyezwa kakhulu ngokwenda sibancane, kunje uyabe ungelandlela ongayenza ukuthi usebenze ngapho u-single. Kubuhlungu kakhulu besicela uhulumende aqinise umthetho lo.” kutsho uNkosikazi Moyo.
Omunye wenkokheli yenhlanganiso yezakhamizi, eye Hwange Residents Association, uNkosikazi Sifiso Sibanda, laye ukhala ngokuhlukunyezwa kwabomama ezimulini.
“Siyakubona ezimulini omamazala obabakazi behlukumeza omalukazana, omkabo njalonjalo bona bevele behlukumezekile. Ngiyafisa ukuthi ngabe kuyatshintsha ukwenzela ukuthi labo lapho abahamba khona bengahlali besethuka njalo kungabi yikuthi ubaba nxa ebona umntwana oyinkazana abone inyama yokuthi azosele kuphela.”uNkosikazi Sibanda uyengeza.
UNkosikazi Sithandekile Mlauzi laye umumethe afanayo. Uthi kunje balutshwane abalwaziyo lolusuku lwe International Women’s Day eZimbabwe ikakhulu emaphandleni.
“Asiqaliseleni emfundisweni le lesilisa siphatheke kiyo,” kutsho uNkosikazi Mlauzi.
“Silokhe sihlanganana lohlupho lwe gender based violence, ama early child marriages endaweni ezitshiyeneyo abanye lokhe bengazi ngamalungelo abo njengabo amama lalokhu okufanele kwenziwe ukuze baphile kahle.”ujulisa njalo lumbono.
Umphathintambo wogatsha lwabomama, uNkosikazi Monica Mutswangwa, izolo utshele intathelizindaba ukuthi lanxa uhulumende esephume lemithetho ehlukeneyo yokulondolozwa kwamalungelo abesifazana kusese kunengi okusamele kwenziwe ukuze zifezeke indingeko zabo.
Okhokhela inhlanganiso yeCommunity Working Group on Health, uMnumzana Itai Rusike laye ukhala ngezinga lokungananzwa kwabomama ngokupheleleyo, ikakhulu kwabazithweleyo, imidlezane kanye langendlela abathola ngayo ukudla okwakhayo.
Uthi kwabazithweleyo, bona njengenhlanganiso bafisa uhulumende akhiphe imbadalo yendleko yezibhedlela lapho sebebeletha njalo baphiwe igazi kungelambhadalo. Uthi kumele njalo bafundiswe ngamalungelo abo kwezenzalo lendaba zemacansini ukuze bazivikele ukudlwengulwa ngomkabo labemuli ukuze kube lentuthuko kuleli.
Phezu kwalokhu, inhlanganiso ye Crisis in Zimbabwe Coalition layo ithi kumele imthetho iqiniswe evikela abesifazane kanye lelungelo labo.
Inhlanganiso yezokhetho, eye Zimbabwe Election Support Network yona ikhale kakhulu ngokwehla kwenani labesifazana ekuphathekeni kwezombusazwe.
Linhlanganiso ithi kukhetho lomnyaka ophelileyo, kube lowesifaze oyedwa oncintise esikhundleni sikamongameli okuveza ukungaxhaswa kwabomama kwezombusazwe.
Indikimaba yokunanza usuku lwe- International Women’s Day lonyaka ikhuthaza ukuxhasa abesifazane ukuze kube lengqubekelaphambili ngesingisi i- ‘Invest in Women: Accelarate Progress’.
Ngomgqibelo mhlaka 9 Mbimbitho kuzakuba lombuthano wokunanza leli langa edolobheni leVictoria Falls.
Forum