Iqale namuhla imidlalo yenguqu kusigaba saphezulu eseCastle Lager Premier Soccer League. Kusasa kulomdlalo okhangelelwe ngabalandeli bomdlalo wenguqu abanengi ozakuba phakathi kweqembu leHighlanders kanye leleDynamos enkundleni yeBarbourfields.
Imidlalo ebikhona namhla iphele kanje; iqembu leCaps United linqotshwe nge 1 ka nya yiChicken Inn enkundleni yeBata, Arenel Movers le Ngezi Platinum Stars zibe ngutshiki lobhanqa 0 - 0 ngaseLuveve, FC Platinum inqobe iChegutu Pirates 1 ka nya ngaseMandava, ZPC Kariba le Tel One zibe ngutshiki lobhanqa 2 ka 2 ngaseNyamhunga, kuthi iGreenfuel itshaye iBulawayo Chiefs nge 2 ka 1 ngaseGreenfuel Arena.
Kusasa ngeSonto kulomdlalo okhangelelwe ngabalandeli bomdlalo wenguqu abanengi ozakuba phakathi kweqembu leHighlanders kanye leleDynamos enkundleni yeBarbourfields.
Ekhuluma phambilini kwalumdlalo umqeqetshi weqembu leHighlanders uKelvin Kaindu ukhuthaze abalandeli bomdlalo wenguqu ukuba babuye ngobunengi bezozibonela ukudla kwamehlo.
“Ngombono wami lowu akusiwo mdlalo omkhulu kweleZimbabwe kuphela kodwa lakuzwekazi leAfrica okokuthi ngabe uyatshengiswa kumabonakude ubukelwe nguzulu wonke waseAfrica. Yebo kambe kube lenkulumo phezu kokuba khona kwawo ekuqaleni kwesizini kodwa lokhu kuphezu kwamandla ethu ngoba kuluhlelo oluvele lukhona. Thina esingakwenza yikulungiselela umdlalo njalo sifuna abalandeli babuye ngobunengi babo bezobukela njalo sifisa ukuba basuke bekholisile kungela zehlakalo zodlakela,” kutsho uKaindu.
Ukaputeni weqembu leHighlanders uAriel Sibanda laye ugcizelele ukuba kuqakathekile ukuba umdlalo udlalwe kungela ngxabangxoza.
“Sizazama njengabadlali ukuba sithokozise abalandeli bethu kanye labasisekela ngemali. Siyazi nyakenye umdlalo kawusaphelanga kodwa siyabakhuthaza abalandeli bethu ukuba babuye ngobunengi babo bezosisekela. Ngumdlalo lowu njalo kababuye bezozikholisela nje kuphela,” kutsho uSibanda.
Kweminye imidlalo yangeSonto iqembu leManica Diamonds lizangqikilana leleSimba Bhora ngaseSakubva kuthi eleHwange lizadlala leleYadah ngasemalahleni.
Iqembu leHerentals lona kalisoze lidlale kulimpelaviki ngoba bekumele lidlale leqembu elinqobe kusigaba seEastern Region nyakenye. Leloqembu kalikazakali ngoba kusaxazululwa insindabaphenduli eyokuba yiliphi iqembu okumele lizodlala kusigaba sePSL phakathi kweBikita Minerals kanye leTenax.
Forum