Izakhamizi zithi amapholisa azihlukuluza kabanzi kungenani lokuthi yizo ezazihlaselwe ngamabhambadzi la.
Ngalokho zithi abakhulu bamapholisa eFilabusi sokumele baphume baphele koGodlwayo. Lokhu kuphume emhlanganweni owenzwe ngoLwesithathu kulandela lesi sehlakalo.
Amambhambadzi la, inengi elikhuluma ulimi lwesiShona kubikwa besebelesikhathi behlukuluza uzulu kulumango ngendlela ezitshiyeneyo. Lokhu kudale ukuthi omahlabayithwale baphindisele ngempelasonto edluleyo.
UMnu Ntando Ndlela yisakhamuzi se-Insiza. Uyakufakaza lokhu.
"Into evele iyisisusa somsindo lo yikuba kulobaba okuthiwa nguZinyama oleMine wasuka wayadinga abantu abangasuki lapha eduzane ukuze bezosebenza eMine yakhe, inengi labo ngabantu besiShoneni, abantu laba kukhanya yizigebengu ezilobudlwangungu okokuthi bebethi bengekho eMine bephume bebhoda bhode endaweni eziseduzane besenza ukuganga, lobudlovu lobubhinya bebamba abantu bebathathela imali lezinto ezitshiyeneyo."
Udlame olubekhona ludale ukulimala kwabantu abambalwa ababalisa amabhambadzi kanye lezakhamizi. Abanye bathwalelwe esibhedlela.
Emhlanganweni oqhutshwe eMahole ngoLwesithathu izakhamizi zisole amapholisa zisithi ebekuhlangothi lwamabhambadzi kungakho kabasabafuni koGodlwayo.
Induna uNdube laye ongene lumhlangano uveze ukudana ngokuziphatha kwamapholisa esithi behluleka ukuqhuba umsebenzi wabo wokuvikela umphakathi.
Amanye amapholisa angasafunakali eFilabusi ebekhona lawo kulumhlangano.
Kuhlezi kuqhamuka udlame endaweni ezitshiyeneyo zeZansi yemaNdebeleni ikakhulu lapho okwenjiwa khona igolide.
Forum