Inkokheli zomdabu zesiqinti sakoMvuthu esigabeni se Hwange, zethula ukuba ikati selilala eziko emizini eminengi kubangelwa yisomiso sokuguquka komkhathi kanye lokuswelakala kwemisebenzi obekungaphathisa izakhamizi ekondleni izimuli.
Inhloliso eyenziwe ngumsakazo we Studio 7 esigcawini lesi, iveze ukuba izilimo ezinengi sezilothiswe lilanga kusiba obala ukuba ababangaki abazachinsa njalo lomganga womile ezifuyweni.
Usabhuku uNkosikazi Siphiwe Sibanda we Vulindlela uthi isimo simanzonzo ebhukwini lakhe, kanti losizo kalukho.
“Amabele ayaphume kuhle kodwa akusela khona okukhona, labantu ukuthi bazakuyangaphi vele kasikwazi njengathi esikhokhela abantu kubuhlungu ngoba abantu bazisifela emakhaya,” kutsho USibanda.
Olibamba lenduna uMvuthu, uMlisa uBishop Sibanda ungeza ekhala kakhulu ngalabo abangaphilanga emzimbenzi labasehlelweni lokunatha amaphilisi engculaza, ethi ngendlala le, nxa kungasabanga losizo bakhona abazasweleka. Uthi lokhe wathwetshulwa yingwe kazake akubone okunje.
“Angikaze ngikubone okunjengalokhu. Kubuhlungu, uyazibuza ukuthi liyaphuma liyatshona kodwa sisiyaphambili kuzalunga la?” ezibuza uSibanda.
“Akulalutho, sibi senkomo akulatshani sezisidla amahlanga.”
Unkosikazi Jeritha Ncube ohola isigaba seMkhayeni yena ukhala kakhulu ngezifuyo.
“Indlala kanti sizayithi pho,” ebuza ngelokudana uNcube.
“Izinkomosesikhalela nje ukuthi izulu line linele zona izifuyo zethu, okwabantu thina sizacela kubomakhelwane umganywana ngigoqoze nje okwabantwana, kodwa enkomeni kunzima ngoba akulatshani.”
Usabhuku ohola isigaba se Bethesda e-Bh8,uMnumzana Joshua Ncube, uthi phezu kwelanga, imhogoyi layo ilothisile.
Kutsho uNcube: “Kuhluphizulu, kwahluphiqhele elitshaye lavala. Baphindile abantu ukulima izulu lahamba lahamba, akulalutho ngikhuluma kunje.”
UNkosikazi Ncube uthi lesi sokuyisikhathi sokuthi uhulumende aphakame adinge usizo kwamanye amazwe.
“Besifisa ukuthi uhulumende asincendise ngokudla. Acele kwanye amazwe zibuye zizophiwa ukudla ngoba sizafa,” kutsho uNcube.
Ukwesaba okuphakathi kwenkokheli lezi kubikwa kusenzakalq elizweni lonke, ikakhulu enyakatho yezansi yamandebele ngokutsho kwenhlanganiso ye United Nations Office for the Coordination of Humanitarian Affairs.
Uphenyo abasanda kuluqhuba luveze ukuba lokhu kubangelwa yikuguquka komkhathi okulethe iyezi elithiwa yi-El Nino elibikwa lizadonsa kuzekuyefika kumnyaka ozayo.
Kodwa ekhuluma ngesimo lesi, umphathintambo kahulumenede owezemithetho, uMnumzana Ziyambi Ziyambi ngoLweSine ukwalile ukuthi sesibucaki isimo elizweni, esithi iziphala ze Grain Marketing Board zilamabele adlula isisindo samathani azinkulungwane ezingamakhulu angamatshumi amabili, 245 000.
Uthi njalo amanzi lawo enele elizweni. Wengezelele wathi uhulumende usezihlomisile ukuthi asize abalambayo, njalo akukabinzima kangako.
Forum