Izakhamizi zeZansi yemaNdebeleni ezilima ngokuthelelezela sezisenwaya impumulo zibheke isibhakabhaka ngoba imifula lamadamu ezidonsa khona amanzi sesitsha okuzadala ukuthi zitshiye izivande zazo lapho ebezithola khona imali yokondla izimuli kuyindlela yokulondoloza amanzi azo kanye lawezifuyo.
Izakhamizi ezixoxe lomsakazo weStudio 7 zithi sezisenkingeni njalo ngoba sokumele zitshiyane lokulima izivande zazo kungenani lokuthi zibhekane lodubo lwamanzi lendlala embi kakhulu.
Zithi ngaphandle kokuthi kune elikazamcolo zizavala izivande ukuze zilondoloze amanzi.
UMnu. Taulo Ndlovu oyisakhamuzi seRamnwana olima phansi komfula uTuli eManama emmangweni weGwanda South uthi lonyaka babhekane lodubo lwamanzi olukuzinga eliphezulu.
"Into esingihlupha lapha ngamanzi, amanzi siyabe sesiwadonsa khatshana njalo kuyabe sekusitshaya kufuel, ukulima kuyasisiza ngoba entweni ezinengi nxa silimile kuyasisiza, angisokoli imali zabantwana zezikolo sithola khonapho, kuphela thina abantu sizahlukuluzeka ngoba sesinatha lezifuyo.
USobhuku weMasholomoshe UMnu. Lovemore Ndlovu uthi izakhamizi zihlale phansi zikhulumisana ngodaba lwezivande ezidonsa amanzi emadamu.
"Lapha eMatshetsheni sekulengozi amadamu kasela manzi, sikhangele indlala enkulu kakhulu.Ngikhuluma lamhlanje abantu bezivande lezakhamizi sebeqalisa ukuphikisana ngodaba lwezivande abanye sebesithi kungasathelelwa abezivande besithi kungcono baphungule izivande abazithelelayo. "
UNkosikazi Julieth Nkiwane oyisiphathamandla senhlanganiso olwela amalungelo abomama lamantombazana eyeWomen Development Association of Zimbabwe uthi udubo lwamanzi lonyaka lukhulu kakhulu.
Ukhansila weGaranyemba UMnu. Miclas Ndlovu ugcizelele ethi indlala ya lonyaka oyamangalisa.
Uhulumende uthi abantu abafika phose izigidi ezintathu 2,7 million badinga ukusizwa ngokudla.
Ekhuluma ngosuku lukazibuse ngoLwesithathu eMurambida uMongameli welizwe UMnu. Emmerson Mnangagwa ugcizelele ukuthi kakho ozabulawa yindlala kuleli.
Forum