amalinks wokungena

Breaking News

Ababalisi Bakhuthaza Abazali Ukuthi Bake Bame Ukusa Abantwana Esikolo


Abafundi beGwanda ekuvulweni kwezikolo

Abenhlanganiso zababalisi bakhuthaza abazali ukuba bake bame ukusa abantwababo ezikolo udaba lweholo labo luze lulungisiswe.

Bathi bona benza inkuthazo le, ngoba abazali bengaqhubeka bethumela abantwana ezikolweni lapho okungela babalisi khona, balakho ukuba sengozini yokuthelelana lula umkhuhlane weCOVID-19 kanye lokuyengana bacine sebeganga.

Linkuthazo ibi munyethwe encwadini yabo yokwazisa intathelizindaba lozulu okuphume emhlanganweni abawungene lohulumende ngoMvulo, wokuhlaziya inkinga ababhekane lazo njengababalisi ezigoqela olweholo ongasaphumanga lesinqumo.

Ababalisi batshaya phansi ngenduku besithi kababuyeli emsebenzini uhulumende aze azinikele ukululungisisa udaba lwezikhalazo zabo ezibalisa iholo elinganeliyo kanye lempahla edingakalayo yokusebenzisa ukuzivikela kumkhuhlane weCOVID-19.

Isiphathamandla senhlanganiso yababalisi bemaphandleni, i-Amalgamated Rural Teachers Union of Zimbabwe ( ARTUZ) umnumzana Wilfred Nyathi uchasisa kabanzi ngalenkuthazo yabo kubazali.

“Uhulumende kakasilaleli ukuthi esinikeze imali engayenza ukuthi sibe lamadlabuzane wokusebenza. Sikhuluma kanje izikolo ezinengi azila babalisi abazabe bekhangela ukuthi abantwana banjani, bathestiwe yini iCOVID. I COVID izabe ilokhu isengezelela isiya phambili. Abantwana, lingakhangela kuma social media lizabona ukuthi sebesenza ukungezwa, abantwana. Kanti bazatshona besenzani kungela babalisi?. Bazali, asenzeni ukuthi sigcine abantwana bethu ngezempilakahle. Bazafunda imali ingaba khona kubabalisi.”

Umnumzana Joseph Sibanda wasemzini weRugare ongumzali uthi okwenzakalayo kubuhlungu ngoba kubuyisela muva imfundo eZimbabwe yona ebinconywa umhlaba wonke eminyakeni eyedlule.

“Okunye lathi sizazama, izikolo lazo zingakhuluma lathi, zisitshele ezifuna uncedo khona, sizame lathi njengabazali ngoba abantwana phela ngabethu, siyafuna lathi ukuthi baphephe kulesi sikhathi esinzima.”

Kodwa uBishop Raymond Mupandasekwa waseChinhoyi usola uhulumende esithi kunje uzulu ongumyanga esethwele nzima ngokuphindiweyo.

“Ngesikhathi amaBishops ebuza ukuthi ziphelele yini kulabo abasembusweni, setheswa umlandu wokuthuka abehofisi kamongameli. Ababuswayo bathethiswa mihla yonke, bethukwa ngabantu banye ababusayo, abakhuluma mahlayana, bengasihloniphi lesisekelo sombuso. Abantwana kabayi ezikolo, ngaphandle kwabalutshwana abalenhlanhla. Abagulayo bethu kabelatshwa lapha ezibhedlela, kodwa inkokheli yethu ibona inhlelo yazo njengezilungile, yibupumputhe obunjani lobu?"

Esethula umbiko wakhe emngcwabeni kamuyi Brigadier General Rufus Chigudu eNational Heroes Acre izolo ngoMvulo, umongameli Emmerson Mnangagwa utshele uzulu ukuba into zonke kwezomnotho zihamba ngendlela.

“Sesizibona izithelo zeBudget ezinhle. Siqhubeka sisehlisa indleko ezinengi, kusitsho ukuba izimali ezinengi seziqondiswe kwezokuthuthukisa umnotho kanye lezokulungiswa kwempahla.”

Inengi labantwana libonakala lizidlalela emaclassini lasegumeni lesikolo, kumbe behlezi duzane laduzane kungalandelwa iziqondiso zokuvimba ukuthelelanwa igcikwane leCovid 19, ezeSocial distancing, bengaqokanga lama mask.

Inhlanganiso ezikhuthaza abazali ukuthi bake bame ukuthumela abantwana esikolo okwamanje ngezibalisa eye Amalagamated Rural Teachers Union of Zimbabwe – ARTUZ, Progressive Teachers Union of Zimbabwe – PTUZ, Teachers Union of Zimbabwe – TUZ, Zimbabwe democratic Teachers Union – ZDTU, Zimbabwe Teachers Association – ZIMTA, Zimbabwe National Teachers Union – ZINATU, Zimbabwe National Educators Union – ZINEU leye Zimbabwe Rural Teachers Union – ZRTU.

Udaba Esilethulwe NguMavis Gama
please wait

No media source currently available

0:00 0:03:40 0:00


Facebook Forum

XS
SM
MD
LG