amalinks wokungena

Breaking News

Ababalisi Bathi Umqatshi Kabengezelele Iholo Andubana Izikolo Zivulwe


Abantwana besesikolweni

Uhulumende ubike ukuba izikolo eZimbabwe zivulwa mhlaka 28 Mpandula emizameni yokuphathisa izifundi eziloba imihloliso ngenyanga ka Lwezi ukuze zenelise ukuthola isikhathi sokulungiselela limihloliso.

Kodwa ababalisi bayakhonona ngendaba zeholo labo lesimo ezikolo besithi bafuna uhulumende alungisise izikhalazo zabo andubana babuyele emsebenzi ekuvulweni kwezikolo.

Isikhulumeli senhlanganiso yeAmalgmated Rural Teachers Union of Zimbabwe (ARTUZ) uMnu Nation Mudzitirwa uthi iholo labalisi selilincane kakhulu okuzakwenza bengabuyeli ezikolo.

“Thina sithi asisoze sibuyele emsebenzini mhlaka 28 ngoba kuyakhanya ukuba umqatshi kasihloniphi. Nxa ubona umama kumbe ubaba ongumbalisi ehola imali engange $US30 kuyakhanya ukuthi uhulumende kasihloniphi kala ndaba lathi. Siqoqa ababalisi ukuba bengayi emsebenzini uhulumende aze asiholise imali eneleyo”

Lokhu kusekelwe ngunobhala weyinye njalo inhlanganiso yababalisi eye Progressive Teachers Union of Zimbabwe (PTUZ) uMnu Takavafira Zhou yena othi bafuna iholo labo baliphiwe ngedola le Melika.

“Njenge PTUZ sithi uhulumende abhadale ababalisi imali engangeleyo asayihola ngo Mfumfu 2017. Imali leyi yayi US500 kusiya ku US520 ngamadola eMelika. Uhulumende ngeke athi imali yabantwana bezikolo ifike $30000 thina sihola $RTGs3000 to $RTGs3500”

Inhlanganiso ye ARTUZ ilobele umphathintambo wezemfundo uMnu Paul Mavima lowezemali uMnu. Mthuli Ncube incwadi ikhalaza ngeholo lesimo sababalisi ezikolo ikakhulu emaphandleni lapho abathi kudingakala ukuba baholiswe ngcono ukuze babuyele emsebenzini.

Imizamo yokuzwa icele lika hulumende ngodaba lweholo lababalisi yehlule ngoba umphathintambo wezemali uMnu Mthuli Ncube ubengadobhi ucingo lwakhe njalo engaphenduli imibuzo ayithunyelwe kumakhalekhukhwini ngewhatsapp.

Kodwa uNcube utshele idale lephalamende ngeviki edluleyo ukuba uhulumende uzama ngazo zonke indlela ukulungisisa udaba lweholo zezisebenzi zika hulumende ezigoqela ababalisi. Kodwa ethi uhulumende akalayo imali yeMelika yokubhadala izisebenzi zakhe, ngakhoke lapho ekhweza iholo uzaholisa ngedola le Zimbabwe.

Facebook Forum

XS
SM
MD
LG