amalinks wokungena

Breaking News

Ababalisi kweleBotswana Bathi Ababuyeli Ezikolo Nxa Bengahlatshwanga iJekiseni yeCOVID-19 Vaccine


Zimbabweans in Botswana

Abanye ababalisi abadabuka eZimbabwe asebehlala kweleBotswana sebamukele inyathelo lokuthi ababuyeli emsebenzini lapho izikolo zivulwa, nxa bengahlatshwanga ijekiseni yeCovid-19 Vaccine.

Uhulumende weBotswana uvale izikolo ngenyanga edluleyo kaNtulikazi ngoba esebone ukumemetheka kweCovid-19 elizweni ngendlela eyethusayo, kodwa akukabi lohlelo lokuhlaba ababalis ijekiseni lokuncedisa umzimba ukuba lamasotsha okulwisa umkhuhlane.

Inhlanganiso ezimele ababalisi kweleBotswana zithi abasoke bephindele emsebenzini ngaphandle kokuthi bonke sebehlatshiwe ijekiseni yeCovid-19 Vaccine.

Uhulumende uvale izikolo ngenyanga edluleyo phezu kokukhathazeka ngoku memetheka kweCovid-19.

Ababalisi abaphose befike ikhulu (92) sebebulewe yiCovid-19 kusukela ngoMabasa lonyaka.

Lokhu kutshiye inhlanganiso emela amatitshala eyeBotswana Education Sector Union (BOSETU) ikhuza isithi akula mbalisi ozabuyela ekilasini engatholanga ijekiseni yeCovid-19.

Izikolo kumele zivulwe emavikini amabili azayo, kodwa isikhulumi seBOSETU, umnunzana Tabokani Rari uthi kuyadanisa ukuthi uhulumende kakakhiphi uhlelo olucacileyo lokuhlaba ababalisi.

“Sekwanele, sesibone kusifa ababalisi abanengi. Asizimiselanga ukuthi siyekele ababalisi bebuyela emangcwabeni. Yilo inyathela esesilithethe.”

Kodwa inengi labo lithi liyesaba ukukhuluma kakhulu ngodaba lolu ngoba lungaphazamisa amathuba abo emsebenzini.

Abanye abeZimbabwe kweleBotswana abafana lo nkosikazi Sindiso Sibanda, bathi kumele ababalisi bebuyele emsebenzini, behlatshiwe noma bengahlatshwanga.

“Mina ngithi ababalisi bebuyele emsebenzini. Ngibona sebezavika ngomunwe. Ijekiseni le ayisikho ukuthi umuntu ubanjwa ngamandla ukuyithatha.”

USibanda uqhubeke esithi uthi kumele kudingwe ezinye indlela zokuzivikela ngakho kumele inhlelo zokufundisa ziqhubeke.

“Asilandeleni ezinye indlela zokuvikela iCovid-19. Angikusekeli ukuthi bengabuyeli emsebenzini uma bengahlatshwanga. Abafundi bayisinda ngalesisikhathi, Imkhuhlane imnengi ebuye yahamba, akukuze kuthiwe abantu akumelanga bebuyele emsebenzi ngoba kabahlatshwanga.”

Umnunzana Mthabisi Dube omunye wabadabuka eZimbabwe, uthi njebazali balesifiso sokuthi izikolo zivulwe njengokuhlelwa mhlaka 17 Ncwabakazi, kodwa bayazwisisa izikhalo zababalisi.

“Kuyazwakala izikhalo zabo, ngoba ababalisi basengozini yokuthelelwa igciwane leli. Bahlangana labantwana abavela emzini etshiyeneyo, ngendlela efanayo abongi kumbe odokotela abahlangana lezigulane ezitshiyeneyo. Ngakho sithi kaba hlatshwe ijekiseni.”

Inhlanganiso yeBOSETU isiqale umkhakaso ngaphansi kwe ndikimba ethi ‘No Jab, No Return To School’ ekhangelelwe ukuthi ibambe ngamandla uhulumende ahlabe ababalisi ijekiseni leCovid 19 Vaccine.

IBOSETU ithi uma lokhu kungenzakalanga, ababalisi beZimbabwe bathi kuqondile ukuthi kungavulwa izikolo uma bengahlatshwanga ijekiseni yokuzivikela kuCovid-19.

Sokulabantu abadlula inkulungwane ezingamakhulu lamatshumi amahlanu (115,202) abatholakala bele coronavirus kweleBotswana, kwabhubha abadlula inkulungwane lamakhulu ayisithupha (1,658) balahlekelwa ngumphefumolo. Abayinkulungwane ezingamakhulu lamatshumi amabili (124,000) sebathola amajekiseni amabili aweCovid-19.

Facebook Forum

XS
SM
MD
LG