Umgcinisihlalo webandla leMDC-T, uMnu. Morgan Komichi uthi bonke ababhalisa ukungena kukhetho bezimele bona bephansi komanyano we MDC Alliance kumele bayesusa amagama abo ilanga lanamuhla lingakedluli.
Kungedlula oLwesine kuyabe kungasacitshe amagama alabo ababhalisa ukuncintisa.
Namhla yilo ilanga lokucina lokususa amagama kugatsha lwezoketho olwe ZEC.
Ukomitshi uthi abazehluleka ukususa amagama abo bazathathelwa amanyathelo angawaqambanga.
Kunjalo nje, ibandla leZanu-PF selithembise ukuba ngomnyaka ka 2023 lizaguqula indlela elizakhetha ngayo amalunga ebandla azabamela ekhansilini, ledale lephalamende ukuze kungabi lokuxokozela kanye lokukhethelwa kwabantu inkokheli njengalokho okwenzakale lonyaka kukhetho lwamaprimary.
Ilunga ledale lephalamende lebandla elibusayo koBulawayo elePhelandaba-Mpopoma, uJoseph Tshuma uchaze ukuba ngempela kwabalokuxokozela kubandla lakhe ngesikhathi kukhethwa amalunga azabamela kukhetho oluzayo.
“Ekungeneni kwethu kumaprimaries ethu lonyaka siwangene kulenguquko ezinengi kusiba labakhokheli abahlukeneyo yikho kubelamaphutha amanengi,” kutsho uTshuma.
UTshuma uthembise ukuba kukhetho oluzayo bazaqhuba amaprimary elections ngendlela abakade bevele beqhuba ngakhona hatshi ukuthi iHarare ibe yiyo ekhetha abantu ngoba ingabazi
Kutsho uTshuma: “Ukhetho oluzayo sikhangelele ukuqhuba ukhetho ngendlela ebeseqhuba ngayo kuminyaka edlule. Lizabona inguquko sibuyisele amandla kuma provincial co-ordinating committees ahluze abantu phansi benakasi amabizo eHarare.”
Ngokunjalo amabandla aphikisayo lawo lonyaka aqhube nzima amaprimary election kuthi amanye avele akazange akwenze lokho.
Kulandela ukuvalela indodana kaMongameli weMDC, uWelshman Ncube, uNkanyiso Brezhnev Ncube ukuma kusiqinti sesibili koBulawayo, ngumsekeli wesikhulumi seMDC, uMBuso Siso uxotshwe umsebenzi ngesenzo sakhe lesi.
UMbuso uchaza isizatho sokulandulela uNkanyiso ukuya kunomination.
“Ngakhutshwa ukumela ibandla kodwa udubo yikuthi isihlalo sikaWard 2 besibekelwe abasakhulayo ibandla lisuke lasikhethela osakhulayo obengekho ebandleni,” kutsho uSiso.
UMbuso uvumile ukuba usexotshiwe ebandleni njalo okubakhubayo yikho okwenzakala kuMDC akusahlukananga lokwenzakala kubandla leZANU-PF.
“Udubo esilalo yikuthi umongameli usufakele indodana yakhe njalo sesibona okwenzakala kuMDC kunahlukananga lakubandla leZANU-PF,” kutsho uMbuso.
Amabandla amanengi awangenanga ukhetho lwamaprimary ngendlela eqotho, kuthi labo abangenayo kwaba lokulwa okuthile kanye lokukhethela abantu inkokheli okutshiye inengi lisola lisithi ukhetho lwalonyaka alukho qotho.
Kunyanga ezayo mhlaka 30 Ntulikazi iZimbabwe ikhangelele ukuya ekhethweni lobanje uzulu kunye lamabandla enelisa ukungena kunomination Court lokhe bengakatholi uluhlu lwababhalisele ukuvota.