Amalunga equla lezizalwane zakweleSouth Africa elizibiza "PutSouthAfricansFirst", bangene ezithaladeni betshengisela ngoLwesihlanu emahofisini ogatsha lwendaba zasekhaya ePretoria besithi bafuna kuxotshwe zonke izizalwane zakwamanye amazwe elizweni ngoba ziyizigangi njalo zibathathela imisebenzi.
Abakade betshengisela laba bebengayi fihlanga induku emqubeni bekubeka sobala ukuthi bafuna bonke abantu bokuza babuyele kubo. Umkhokheli wale inhlanganiso umnumzana Mario Khumalo uthi bunengi ububi osebubuye lalaba bantu bokuza.
“Abantu bangaphandle bayasimoshela abazanga ngenhliziyo emhlophe. Babulala ingane, bayadlwengula, bathatha imisebenzi yabantu ba la ekhaya. Bayadelela futhi abanayo inhlonipho. Abanyenje abanengi baze ngomgunyathi abanawo amaphepha. So besicelanje ukuthi babuyele ezweni labo, lathi sixazulule inkinga zethu. Abantu okumele bafikela ngabantu abaziphethe kahle.”
Leyinto ebivunyelwana yilabo akade betshengisela abedlula ikhulu.
Ugwalo lwezikhalazo abalu hambise kugatsha lwendaba zase khaya, olwezemisebenzi lakuhulumende weGauteng bafuna wonke amapermit oxolo anikezwe izizalwane zase Zimbabwe, Mozambique le Lesotho esulwe. Bafuna njalo abakwanye amazwe abenza imisebenzi engadingi amakono njengo kusebenza endaweni zokudlela baxotshwe kuleyo misebenzi ithathwe yizizalwane zase South Africa.
Bakubeke kwacaca ukuthi abakwamanye amazwe akumelanga bavunyelwe ukwelatshwa mahala noma ukuthola inhlelo zika hulumende noma ziphi mahala
Omunye wezizalwane zase South Africa lezi unkosazana Lindiwe Matlawa uthi ulahlekelwe ngumsebenzi ngenxa yokuthi inkampani abeyisebenzela iwile iwiswa ngamankampani akwamanye amazwe athengisa izinto ezifanayo.
“ You can’t usuke all the way from le up in Africa ufike uzobeka itafula lamatamati la. Why ungalibekanga la ophuma khona. Bangaki abantu abangasebenzi okumele ngabe bayalibeka leli tafula. Khona manje la e Alex Mall kulepassage there is not even one South African, kugcwele abantu bokufika.”
Kodwa ke omunye wezizalwane zeZimbabwe umnumnzana Carnicious Nkala uthi akusi qiniso ukuthi bonke abamanye amazwe bayizigangi njalo bathathela banye umsebenzi.
“Noma yikuwaphi amazwe okuthiwa alemali noma anjani sithola vele abantu bangaphandle behlala bekhona bonalabo elibabiza ngokuthi ngama foreigner, So, le yinto ongeke uyimise.”
Umnumnzana Nkululeko Mathe uthi abeSouth Africa laba bangakhohlwa lokusola uhulumende wabo ngalokhu okwenzeka eZimbabwe.
“Labo kumele bakunanzelele ukuthi ugovernment wabo nguye one corruption njalo osaphota icorruption yeZanu pf kantike ube kavumelani nakho ngabe sisekhaya manje.”
Kunjalo iziphathamandla zogatsha lwendaba zasekhaya zalile ukuphawula zathi kumele baqale babhekisise lezi zikhalazo.
Abebetshengisela laba bathi kungaphela insuku ezilitshumi lane bengaphendulwanga bazokwenza bona lokho abebefuna uhulumende akwenze.