Izizalwane zeZimbabwe ezihlala kuzwekazi leEurope zamukele ngendlela ezitshiyeneyo ngesinqumo somthethwandaba weConstitutional Court esokulahla isicelo sokuthi kuguqulwe umthetho wezokhetho ukuze abeZimbabwe abasemazweni bavunyelwe ukuvota bekulawo mazwe.
Inengi elihlala eEurope lithi vele bekusobala ukuthi ngeke kwenzeke ukuthi bavunyelwe ukuvota bengaphandle ngoba abazange babhalise ukuvota.
UBob Sigola ngumsekeli webandla leZanu PF ohlala edolobheni leBirmingham eNgilandi wemukela isinquno somthethwandaba we ConCourt.
“Mina ngivumelana lawo uyazi abantu ngiyabezwa bayacomplainer bayakhala ngecourt bathi icourt iphambanisile, mina ngivumelana lenkantolo. ICourt iyenze kahle ngoba unganzanzelela laphana eZimbabwe there is about 210 constituencies kuthi kunjalo abantu bacaphakele umhlaba wonke jikelele,” kutsho uSigola.
Ngempela kusobala ukuthi ukhetho lusalelwe zinyanga ezimbili bekuzabanzima ukuthi abangaphandle kweZimbabwe bavote besemazweni abahlala khona.
UNqobizitha Maplanka ngumsekeli webandla leMthwakazi Republic Party. Ke sizwe imbono yakhe:
“IParty engifuna ukuthi ngikhuthaze abantu ukuthi beyivotele yiparty yeMthwakazi Republic Party, iparty le yiyo yodwa iparty engasimela. Amaparty eMpumalanga asesitshengisele ukuthi abasithandi njalo abasihloniphi njalo abantu bakhona bayintwenye, balamanga amangalisayo abantu bakhona, bonke oChamisa labantu beZanu yintonye akutshiyananga,” Maplanka.
UNkosazana Linda Shumba uhlala eFrance uthi ukufakwa kosuku lokhetho ekupheleni kukaNtulikazi ukubona kuseduze kakhulu njalo losinqumo seCon Court simethusile
“Njengoba ama elections eseseduze ngizwa ngolokudana kakhulu cause asiphiwa thina esingapha eDiaspora iopportunity yokuthi sivote and njalo loba singavota siyavotela ubani cause akukhanyi, akula order, into zakhona ngoba ungaze ukhangele ukuthi uvotele wuphi akula vele ongamvotela lokuthi nxa ufuna ukuncedisa uyadinga uswele ukuthi uyancedisa nga uqalisa ngaphi utshiyangaphi,” kutsho uShumba.
UNkosazana Tryphine Moyo uhlala kweleGermany laye uthi inkokheli ezikhona azivoteleki.
“So nxa besithi abantu kabasuke eDiaspora bahambe ekhaya bayevota batsho ukuthi abantu basuke bayevota ngubani onguye esingamvotela. Nxa sikhangele iMDC akulamuntu esingamvotela sikhangele iZanu ngubani onguye esingamvotela esingamthemba ukuthi uzasisusa kulesisimo esikuso asefake sibephambili kubelengqubekela phambili elizweni lakithi,” kutsho uMoyo.
Usuku lokhetho solubekiwe mhla zingamatshumi amathathu kuNtulikazi abantu beZimbabwe bayavota bekhetha uhulumende omutsha kukanti labo abahlala ngaphandle kweZimbabwe sokumele behle bayekhaya eZimbabwe ukuyavotela ababathandayo.
Kodwa inengi lithi hatshi ngeke lizifake kundleko ezingaka ngokugada indizamtshina ziyevota eZimbabwe.
