Abakhokheli bamazwe omhlaba kanye labezokholo sebethule amazwi enduduzo kulandela ukutshona kukaArchbishop Desmond Tutu weleSouth Africa.
UTutu ubhubhele endlini yakhe eCape Town izolo eseleminyaka yokuzalwa engamatshumi ayisitshiyagalolunye, 90.
UMongameli weleSouth Africa uMnu Cyril Ramaphosa uthe ilizwe lakhe lilahlekelwe ngumuntu obeyisibonelo esihle owayelesibindi njalo owadlala indima enkulu ekulwiseni lohulumende wabelungu owawuncindezela abensundu.
URamaphosa uthe uhulumende uzahlela isikhatho sokukhala ilizwe lehlise am-aflag.
Uthe njalo uhlelo lokubekwa kukaTutu luzakhokhelwa yisonto yakhe yeAnglican, eyiyo ezaphuma losuku lokubekwa kwakhe.
Umkhokheli weBhilithani uMnu Boris Johnson, umholi weCanada uMnu Justin Trudeau loMongameli Joe Biden waseMelika labo bethule amazwi enduduzo emulini kaTutu.
Abathathu laba bachaze uTutu njengomuntu owayelwela amalungelo oluntu njalo owalwisana ngesibindi lohulumende wabensundu owawuncindezela abensundu kweleSouth Africa.
Abamasonto, abagoqela uMfundisi Useni Sibanda owenhlanganiso yeZimbabwe Christian Alliance, labo bathe bakhala ndawonye lomndeni kaTutu.
