amalinks wokungena

Breaking News

Abakhubazekileyo Bakhala Ngokuswelakala Kwenhlelo zeBraille


USenator Joshua Malinga
USenator Joshua Malinga

Abakhubazekileyo ngokungaboni emehlweni base Zimbabwe bamanyene labanye emhlabeni jikelele ekunanzeni usuku lweWorld Braille Day eHarare lapho abakhuthaze ukuthuthukiswa kwenhlelo zokubatholisa impahla ephathisa emsebenzini yokubhala lokubala kwabangaboniyo lababonela khatshana, ukuze bathuthuke labo empilweni.

Lumbuthano owenzelwe eHarare City Library ngoLwesithathu.

UMnu. Abraham Mateta, osakhulayo oligqwetha elilwela amalungelo abantu abakhubazekileyo, uthi kukhanya abakhubazekileyo betshiywa ngaphandle kwenhlelo ezinengi.

“Inkinga enkulu ngesingathi ngesilungu ngama negative attitude kundaba zabakhubazekileyo okucina kuthiwa lokhu kuyadula … Okwakhathesi uzabona ukuthi into ezidingakalayo ngabantu abangaboniyo okubalisa lokokubhala iBraille lapha eZimbabwe azitholakali ngendlela eqondileyo.”

Lumhlangano ubuthanise abameli bengatsha ezithile zikahulumende lenhlanganiso ezizimeleyo.

UMnu. Masimba Kuchera
UMnu. Masimba Kuchera

UMnu. Masimba Kuchera, ingcwethi ecubungula ezenotho njalo owenelise ukuphathiswa isikolo seCopota School for the Blind lese Dorothy Duncan Braille Centre, uthi imbuthano enje iqakathekile minyaka yonke ukuthi kuqhubekwe kukhunjuzwa iziphathamandla ngendubo ezibhekana labakhubazekileyo okugoqela udabo lweBraiille olulokhe lungalungisiswa.

“Ilokhe iludubo iBraille ngoba ayikatholakali endaweni ezinengi lapho abantu abangaboniyo abafunda khona. Ezinye izifundo ezinjenge Maths ababalisi abenelisi ukuifundisa ngeBraille. Into enje ngomculo layo ungayifundisa ngeBraille kodwa asizifundi into zonke lezo.”

USenator Joshua Malinga, umcebisi omkhulu kunkokheli yelizwe endabeni zabakhubazekileyo, uthi uhulumende ulesifiso sokulungisisa indaba zabakhubazekileyo kuleli noma kuphazanyiswa ludubo lwemali elizweni.

“Kuhamba kancane. Kodwa uhulumende lo esilaye omutsha ufuna ukuguqula izinto abantu abalimeleyo baphathwe njengabanye abantu kukho konke okwenzakalayo.”

Usuku lweWorld Braille Day lunanzwa minyaka yonke ngoNhlolanja.

Udaba Esilethulelwe NguMark Peter Nthambe
please wait

No media source currently available

0:00 0:02:54 0:00

XS
SM
MD
LG