amalinks wokungena

Breaking News

AbakoBulawayo Bathi Akulethi Nguquko Ukubhubha KukaMugabe


Umnumzana Robert Mugabe

Uzulu wako Bulawayo uveze imizwa ehlukeneyo kulandela ukubhubha kowayenguMongameli umnunzana Rorbert Mugabe, abanye bethi ukufa kwakhe akulethi mehluko empilweni zabo ikantike abanye besithi wayeliqhawe ezwekazi leAfrica.

UMugabe obeseleminyaka phose elikhulu (95) ubhubhele esibhedlela sakwele Singapore lapho abikwa ebeselatshwa khona kusukela ngenyanga kaMabasa

Ezabelweni zeMatabeleland uzulu uthi akatholanga inhlalakahle ngesikhathi uMugabe ebusa, izikolo imigwaqo amankampani lokunye kwakungathuthukiswa okwenza izabelo lezi zihlale zikhala ngokuncindezelwa.

Unkosikazi Hilda Zulu isakhamuzi sakoBulawayo, uthi ukutshona kukaMugabe akuguquli lutho kodwa kwakumele uzulu angamkhiphi embusweni ngendlela akhutshwa ngayo.

“Mina ngibona engani ukufa kuka Mugabe akutshintshi lutho ebantwini beZimbabwe njalo futhi ngibona engani kwakungamelanga simkhuphe ngendlela esamkhupha ngayo esikhundleni sakhe ngoba unkulunkulu wayevele ekuhlelile ukuthi uzamthatha ngesikhathi lesi ngoba nanku umyaka lokhe ungakakwani usemthethe unkulunkulu. Mhlawumbe indlela esamkhipha ngayo yiyo isijeziso sethu njengabantu beZimbabwe yikho lokhe silobuzima obungaka elizweni lowo esesikhundleni esehluleka ukuqondisa izinto ngoba mhlawumbe indlela esenza ngayo ingaqondanga ngakho ngibona engani asonto esingayijabulela ukuthiuhambile ngoba kungelamahluko ozadaleka empilweni zethu.”

Umnunzana Dumile Ncube esinye njalo esakhamusi sakoBulawayo laye uthi imfa kaMugabe ayiguquli lutho ngoba eMatebelaland akula nguquko loba intuthuko.

‘‘Akula buqhawe ade bukhona kuMugabe khathesi ilizwe linje nguye njengeMatebeleland asila development asilani bekunguye umqali yodaba umqali wodubo lwethu .Sasithaba sisithi ngo 1980 sithethe ilizwe kuSmith abelungu kanti hayi dololo akenzanga lutho uMugabe okumangalisayo ngaphandle kokubulala ilizwe kuphela ,sinje khathesi siyahawula eZimbabwe eMatebeleland nguyenalo ufile ufile akusiletheli lutho thina akusitshintsheli lutho ukufa kwakhe ngoba wavele wasibulala kudala khathesi siphila ngomusa kankulunkulu eMatebeleland .’’

U Ncube uqhubeke ethi ubuhlungu ngoba esaphila uMugabe akabuyanga ukuzo xolisa ngesiga sombuqhazwe weGugurahundi.

“Safa nge Gukurahundi 1982 to 1987 igukurahundi yatshaya abantu bafa kunje abanengi abala mabirth certificate abala zithupha baphephela Egoli kumagumbi amane omhlaba besiyabona ukuthi bayezama ukuzifihla lokuphila ngendaba yakhe uMugabe lowu obulele ilizwe .Khathesi sibuhlungu ukuthi ufile engazange abuye azoxolisa eMatebeleland ngesahlakalo sakhe asenzayo asenzayo ngo1980 sithatha ilizwe upto khathesi aze aphume esikhundleni ngo 2017 besifisa ukuthi ngabe uthe engakafi wabuya eMatebeleland wazoxolisa simbone ukuthio kwakungamadimoni kwakungayisuye .”

Umnumzana Nobert Ndlovu uthi babonga ukuthi inkosi impumuzilile kodwa izilonda zeGukurahudi lokhe zingakapholi.

"Thina ngapha njenge Matebeleland ngezinye indlela siyakuthabela ukuhamba kwakhe coz akulanto enhle asitshiyele yona usitshiyele ubuhlungu wayesithi Zimbabwe will never be ecolony again but thina besi under icolony yakhe labantu bakhe khonale abasiboni njengabantu ,Thina ngapha asilahlekelwanga yilutho thina kithi lokhe kufana thina lokhe silezilonda ze gukurahundi ezayenzakalayo asilahlekelwanga ,esikubongayo yikuthi inkosi imphumuzile kuphela but kithi ematebeleland kuyafana .’

Unkosikazi Sandisiwe Nxumalo uthi ukwedlula komuntu emhlabeni akukho lula njalo akuhlekisi kulobuhlungu obubakhona.

“Ukudlula komuntu asonto ehlekisayo kumbe enjani, umuntu ngumuntu lapho adlula khona uyezwa ubuhlungu ukuthi kwedlule umuntu. Ngumuntu uphilile siphile laye sibonile asenzele khona sikhulumile esikukhulumayo kwenzakala okwenzakalayo kodwa ekupheleni kwakho konke ngumuntu esiphile laye ukwedlula komuntu akukaze kwabakuhle akukaze kwabamnandi.’’

Umnumzana Mxolisi Moyo omunye wabasakhulayo uthi iqhawe seliphumule ngoba ubesesebenzile okwakhe.

“Mina njengomuntu omutsha ngiyajabula ngokuhamba kuka RG Mugabe ngoba ubaba sephumulile umdala elale ngokuthula uMugabe ngiyajabula sibili ukuthi sephumulile ubesesebenzile ubeliqhawe sibili iqhawe lamaqhawe uMugabe.”

Uzulu wakobulawayo uveze ukuthukuthela lokuzonda ngesenzo esenziwa ngowayengumongameli welizwe bethi nguye abebemukhangelele ukuthi uzadonsa abanye ayelabo ngesi khathi sombhuqhazwe weGukurawundi aqale yena ukuxolisa ukuze ababeduzane laye abagoqela losenguMongameli uMnangagwa labo bakubone ukuqakatheka kokuxolisa uhlwehlisa inhlungu zalabo abathinteka ngalesi siga.

Loba esehambile abanye ngabathi usephumule ngoba okukaNkulunkulu akuphikiswa ikantike udlalile eyakhe indima njalo ubesekhulile.

Udaba lwemibono yemfa kaMugabe siluphiwa nguBathabile Masuku
please wait

No media source currently available

0:00 0:03:21 0:00

Facebook Forum

XS
SM
MD
LG