Izakhamizi zemaphandleni esabelweni seZansi yemaNdebeleni seziveze ukukhathazeka ngodlakela oluqhamuke kweleSouth Africa zisithi lokhu kuzadala ukuthi zibhekane lendlala ngoba ziphila ngokudla ezikuthunyezelwa eGoli. Abanye bathi besabela ukuthi mhlawumbe abantwababo bafile kuloludlakela.
Inengi lezakhamizi kulumhlubulo liphila ngokudla okuthunyezwa yizihlobo ezisebenza eGoli okubuya labomalayitsha.
Kodwa kulandela udlame oluqhamuke kweleSouth Africa kunsukwana ezedluleyo kulandela ukubotshwa kukaMnu. Jacob Zuma owayengumongameli walelolizwe, inengi lithi lokhu kungadala ukuthi zilambe ngoba labo abathumeza ukudla belakho ukulahlekelwa yimisebenzi.
UNkosikazi Siphathisiwe Nkala isakhamuzi seSilikwe eGwanda North uthi ikusasa yabo ibuvilibana ngenxa yokungahlaliseki kweleSouth Africa.
UMnu Lovemore Ncube isakhamuzi seMatobo laye uthi ukhathazekile ngezehlakalo kweleSouth Africa.
UMnu. Vusa Nkala odabuka eGungwe eGwanda South ephila ngokuthenga impahla kweleSouth Africa ethengisa kuleli uthi sekunzima ukuthi bawode impahla kweleSouth Africa okuzadala ukusilela kwempahla kuleli.
Ukhansila kaWard 13 uMnu. Miclas Ndlovu uthi laye wesabela ukuthi impahla zizasilela ezitolo okuzadala ukukhuphuka kwentengo yazo.
UNkosikazi Julieth Nkiwane ongumqondisi wenhlanganiso elondoloza amalungelo abesifazana eyeWomen Development Association of Zimbabwe uthi inengi labomama litshaywa luvalo.
Osomabhizimusi kanye labacubungula ezomnotho bathi udlakela olusaqhubeka kweleSouth Africa lulakho ukubangela ukusilela kokudla kuleli.
UMongameli Emmerson Mnangagwa uthi kumele kubelokuthula kwele South Africa esithi loludlame lulakho ukuphehla udlakela kwamanye amazwe agoqela eleZimbabwe.
Izizalwane zaseZimbabwe ezifika phose izigidi ezintathu, three million zasuka kuleli ukuyadinga amadlelo aluhlaza kweleSouth Africa kulandela ukubhdidlika komnotho welizwe.
Kambe udlakela oluqhubeka eSouth Africa le eSwatini lapho okulabanye abasola umbuso wenkosi uMswati Wesithathu luzakuba lomthelela onjani emhlubulweni weSADC, okugoqela eleZimbabwe? Ukuhlaziya loludaba, sixoxa loMnu. Benard Bhekilizwe Ndlovu, ingcwethi ecubungula ezombusazwe.