amalinks wokungena

Breaking News

Abalimi Bathi Kabatholi Inhlanyelo Lemvundiso ye Fertilizer


Abalimi bafaka imvundiso ye fertilizer emasimini.
Abalimi abanengi ezabelweni ezinjenge Manicaland, Mashonaland East, Midlands kanye le Matabeleland bathi kabakatholi inhlanyelo lemvundiso ye fertilizer enikwa uzulu kuhlelo lukahulumende lwezokulima olusungulwe lonyaka.

Abalimi laba bathi loba uhulumende ebike ekuqaleni kukaNcwabakazi ukuthi usethole izigidi ezilikhulu lamatshumi ayisithupha amadollar – $160 million – yokuqhuba uhlelo lolu, kabatholi inhlanyelo yomumbu kanye lemvundiso ye Compound D. Bathi loba inhlanyelo ithengiswa ezitolo, iyadula okwamagama.

Abanye abalimi bathi okutholakalayo yimvundiso yeAmmoninum Nitrate layo elentengo engafinyelwa muntu. UMnu. Jack Murehwa, umqondisi weSable Chemicals elungisa imvundiso yeAmmounium Nitrate, uthi imvundiso le iyatholakala ezitolo ezinengi.

Kodwa-ke abanye abalimi bayakuphikisa lokhu besithi abanikazi bezitolo bathi bamelele imvundiso yeAmmonium Nitrate le Compound D ethengwa kwele China. Ngaphandle kwemvundiso yeFertilizer, abalimi bathi kabatholi inhlanyelo yomumbu.

Umnu. Kenias Kayen Mpofu, isakhamuzi seLupane, uthi inhlanyelo yomumbu inikwa abalandeli bebandla le Zanu-PF.

Unkosikazi Stella Ncube we Gwanda North uthi sebeyitholile inhlanyelo eholiswa nguhulumende.

Ingcwethi kwezokulima uMnu. Everson Ndlovu uthi kumele uhulumende alungiselele ukulima mnyaka yonke ukwenzela ukunqabela indlala.
XS
SM
MD
LG