amalinks wokungena

Breaking News

Abakhubazekileyo Emzimbeni Bakhala Ngokunganikwa Amathuba Okuvota Kukhetho Oluzayo


Izisebenzi zeZimbabwe Electoral Commission zifundisa abantu indlela zokuvota
Izisebenzi zeZimbabwe Electoral Commission zifundisa abantu indlela zokuvota

Annastacia Ndlovu

Ikhomishini yeZimbabwe Electoral Commission (ZEC) ngoLwesithathu yenze umhlangano labantu abakhubazekileyo koBulawayo lapho abethule khona okuzakwenzakala ngesikhathi sokhetho.

Abakhubazekileyo abangene umhlangano lo bathi kabasuthisekanga ngokwethulwe yiZEC.

Inengi labantu abakhubazekileyo eZimbabwe bayehluleka ukuphatheka ngokugcweleyo kukhetho oluzayo ngoba iZEC yehlulekile ukunanza indingeko zabo ezingabenza baphatheke kukhetho.

Ukhomishina weZimbabwe Human Rights Commission, uNkosikazi Sethule Ncube, uchaze ukuba bazizwile izikhalazo zonke zabantu abakhubazekileyo.

“Izinto abazikhulumileyo zimqoka sekuqakathekile ukuba sihlanganise amakhanda sibone ukuba abakufisayo siyakugcwalisa njalo lephepha lokuvota libeyilokho abakukhalelayo.”

Ukhomishina weZEC uNkosikazi Sibongile Ndlovu, ongene umhlangano lo, uchaze ukuba lonyaka abantu abakhubazekileyo bayancediswa ngabantu abasuke labo emakhaya hatshi abazabe bekhangelane lokuqhutshwa kokhetho kumbe ipholisa.

“Sithanda ukwazisa uzulu ukuba abantu abakhubazekileyo abayikuncediswa ngabantu abasendaweni yokuvotela kodwa abayabe beze labo lokhu kuhlelwe ngumthetho omutsha wezokhetho.”

UNkosikazi Ndlovu uthi izikhalazo zabantu abakhubazekileyo bayazizwa kodwa sokumele iZEC iphume lendlela ezizakwenza zigcwaliseke ukuze bavikeleke kubudlwangudlwangu bokhetho.

“lzikhalazo zabo zokufuna ibrail lesing language siyazizwa kodwa sekumele siphume lendlela ezabavikela kanye lokuthokozisa iZEC labo.”

UMnu. Killian Dube, ongene lumhlangano njalo ophila lobugoga, ukhale ngendlela ezingafinyelelekiyo ngesikhathi sokhetho kanye lamaphepha okuvota abantu abayiziphofu kumbe abayizacuthe angekhoyo.

“Indawo zokuvotela azilula ukufinyelela njalo lamaphepha okuvota awahambelani lesimo sabantu abakhubazekileyo njalo lokhu kwenza ukhetho lubenzima kithi.”

Omunye njalo owenelise ukungena lumhlangano, uNkosazana Sinikiwe Ndebele, uvumelane loMnu. Dube esithi inkinga ezikukhomishini yeZEC ezingagoqeli labo zibenza bahlehlele emuva bangaphatheki ekhethweni.

“Okwenza sehluleke ukuphatheka kukhetho yikuthi siyaswela ulwazi ngezokhetho, kanye lobunzima bokufinyelela lapho okuvotelwa khona kuhlanganisa lokuthi umphakathi awusamukeli kahle.”

IZimbabwe isifike esibangeni esiphezulu samalungiselelo okhetho oluzakwenziwa mhlaka 30 ngoNtulikazi lonyaka.

Ikhomishini yeZEC isibike ukuba uluhlu lwababhalisele ukuvota iVoters’ Roll sebelayo kodwa abakhubazekileyo bathi bazizwa betshiwe phandle kukhetho oluzayo ngoba amalungelo abao ephulwe nguhulumende leZEC kungenani lokuthi indingeko zabo zafikiswa kuZEC kusaselesikhathi.

XS
SM
MD
LG