amalinks wokungena

Breaking News

Abantu Abanengi Okumangalisayo Bagola Amacimbi eGwanda


Nanka amacimbi achayiweyo eCollen Bawn.

Abantu abanengi okumangalisayo sebegcwele emapulazini eGwanda esabelweni seMatabeleland South lapho abagola khona amacimbi. Abantu laba bahlala lapho okungela zambuzi lamanzi ahlambulukileyo okungenza ukuthi kuqhamuke umkhuhlane wesihudo.

Amacimbi azidlela amahlamvu esihlahleni sephane.
Amacimbi azidlela amahlamvu esihlahleni sephane.

Kulabantu abanengi kakhulu eCollen Bawn abahlala ezindlini ezingatsho lutho egangeni eCollen Bawn lapho asebegola khona lamacimbi ahamba emigwaqweni, onjengalowo osuka koBulawayo usiya eGoli.

Amacimbi otholakala njalo endaweni ezibalisa iTshindeni, iSandawana Turn Off eWest Nicholson lezinye ezimbalwa lapho okulabantu abavela eMberengwa, Chiredzi, Beitbridge leMasvingo.

Banengi abesifazana abagola amacimbi ...
Banengi abesifazana abagola amacimbi ...

​Endaweni yeDip Four eCollen Bawn, kulabantu abangafika phose inkulungwane abagola amacimbi. Omunye wabagola amancimbi nguNkosazana Maria Jakaraska, osuka eMwenezi, othi uhambe umango wonke lo ukuzegola amacimbi ukwenzela ukuphandela umdeni wakhe impilo.

Ukhathazwa yikuswelakala kwezambuzi esithi kulakho ukuqhamuka umkhuhlane wesihudo kuleyo ndawo.

UNkosazana Siphathisiwe Ndlovu, osuka eShangani, uthi laye ugola amacimbi ukwenzela ukubhadalela abantwana imali yemfundo. Umangaliswa yikuthi kulabantu abalutshwana abadabuka ezabelweni zeMatabeleland abagola amacimbi.

Abantu abathengisa impahla etshiyeneyo eCollen Bawn lapho okugolwa khona amacimbi.
Abantu abathengisa impahla etshiyeneyo eCollen Bawn lapho okugolwa khona amacimbi.

Uphinde wathi zinengi inkinga ababhekane lazo ekugoleni amacimbi ezigoqela ukuhlaselwa zinyoka.

UMnu. Dennis Dube, oyisakhamuzi koGodlwayo eFilabusi oseleminyaka eminengi egola amacimbi eDip Four, uthi kakaze abone abantu abanengi kangaka bezogola amacimbi.

Amazwi akhe agcizelelwe ngumnikazi wepulazi leDip Four, UMnu Sifanjani Moyo, othi abantu abanengi abazegola amacimbi bavela empumalanga.

Kulabantu abahlala kuzindlwana ezisegangeni lapho okugolwa khona amacimbi.
Kulabantu abahlala kuzindlwana ezisegangeni lapho okugolwa khona amacimbi.

Uthi imikhuhlane ilakho ukuqhamuka kuleyo ndawo ngoba akula izambuzi lamanzi ahlanzekileyo lapho abantu abagola khona amacimbi bebanengi.

Abanye abakulindawo ngabathengisa okudliwayo. Batshintshisa impahla abalayo ngamacimbi. Inengi labantu liyakhe okuyizindlu okungatsho lutho eceleni komgwaqo lapho abalala khona labantwana abancane.

Udaba Esilethulelwe NguAlbert Ncube
please wait

No media source currently available

0:00 0:03:22 0:00

Facebook Forum

XS
SM
MD
LG