amalinks wokungena

Ukusilela kwemali emabhanga osokusenza ukuba abantu bahlale isikhathi eside bekundwendwe zokudinga imali sokuphazamisa ithuba labantu ukuthi balungiselele ikhefu leKhisimusi.

Ngesikhathi sekusele amalanga amathathu nje kuphela ukuthi kube lilanga leKhisimusi kuvame ukuba abantu babe bejabula bekholisa lemmuli zabo.

Ngalesi sikhathi inengi liyandise ukwethekelela indawo ezinengi kodwa lonyaka balutshwana abenza lokhu.

Kuthi asebephila ngokuzenzela babona kuncono ukuqhubekela phambili bedinga imali ngokuthengisa emikambo.

Abasakhulayo labo bathola ithuba ngokuncintisana behuga abantu abatholakala bezulazula bezama ukuthenga impahla etshipileyo yabantwana emkambo osukhanya ulokwanda kwempahla ezigugileyo.

Ingcwethi ecwayisa inhlanganiso yezisebenzi eye ZCTU, uMnu. Elijah Mutemeri, uthi idlabuzane leKhisimusi lokuzijabulela sokuyize ngenxa yokwenzakalayo elizweni.

UMnu. Admire Zaya owenhlanganiso ye Chitungwiza Progressive Residents Association uthi eChitungwiza okuhlala abantu abanengi kuyakhanya sibili ukuba lonyaka kulobunzima.

Bekuyinhlalayenza nje ezitolo ezethekelelwe yiStudio 7 lapho abathengisa impahla etshiyeneyo abakubeke sobala ukuthi balutshwana abantu abathenga abakufunayo ngenxa yokusilela kwemali.

Ezinye zalezi zitolo zisebenzisa indlela ezitshiyeneyo zokuhuga abathengi kugoqela ukutshaya ingoma ezithandwa nguzulu okunjengokumemezela impahla ethingiswayo.

Unobhala jikelele wenhlanganiso yezisebenzi eye Zimbabwe Congress of Trade Unions, uMnu. Japhet Moyo, uthi izisebenzi zithwele nzima ngoba akulamali eZimbabwe.

XS
SM
MD
LG