amalinks wokungena

Breaking News

Abanye Abantu Bethuswa Nguhulumende Osefuna Ukudinda Imali Entsha eZimbabwe


Okwenzakala ngesikhathi kusethulelwa uzulu imali yohlobo lwama bond notes.

Abantu abanengi bathi abakwazi okuzakwenzakala eZimbabwe kungethulwa imali entsha esikhathini esifitshane esilandelayo ezasetshenziswa leyohlobo lwama bond notes, amaRTGS leyinye.

Abanye abantu abakhulume lomsakazo weStudio 7 koBulawayo ngoLwesithathu bathe bazamelela bahlolisise indlela imali entsha ezasebenza ngayo.

Kulabanye njalo abathandabuza ukuthi kuzakuba lenguquko kwele Zimbabwe sokusetshenziswa imali entsha.

Omunye walabo abangelaqiniso lokuthi kuzakwenzakalani nguMnu. Khululekile Sibanda, othi akulunganga ukubala inkukhu amaqanda engakacacadi.

UMnu. Sibanda uthi usehlalele evalweni ngoba kalathemba lokuthi imali yohlobo lwebond izasala ithenga kumbe hatshi.

Esinye isakhamuzi sakoBulawayo, uMnu Lucky Tshuma, uvumelane loSibanda ethi kaboni ukuba imali entsha ezadindwa nguhulumende izadala umehluko kuzulu.

Kusenjalo, indwendwe zezimota ezidinga amafutha ezimota ziqhubekela phambili edolobheni lakoBulawayo kuhlangene lendwendwe zokudinga imali emabhanga lapho abantu abaphiwa khona imali yamatshe engaphansi kwekhulu lamadola ngeviki.

UMnu Mandla Tshuma, isakhamuzi sakoBulawayo, uthi imali itholakala emikambo yensitha.

“Ukusilela kwemali lamafutha ezimota lokuqansa kwentengo yokudla emavinkilini sekusitshiye ebunzimeni emabhanga akulamali kuthi lentengo yempahla isikhuphukile. Kungabakuhle ukuba uhulumende angenele alungisise loludubo lwemali yamabond.”

UNkosikazi Sanelisiwe Hadebe laye uhlaba umkhosi omkhulu ngokuqansa kwentengo yempahla lokudla ezitolo kanye lokusilela kwemali.

"Kulez’insuku sidonsa nzima asilali sikhathazeke okuphezu kwamandla ethu. Intengo yempahla isiphezulu okwamagama njalo lemali iyasilela ayikho emabhanga."

Sibi okumangalisayo isimo zomnotho kwele Zimbabwe ngesikhathi uhulumende esithi uzama ngedlela zonke ukuthi alungise konke okuhlupha uzulu.

Facebook Forum

XS
SM
MD
LG